اقوام متحدہ دی اک رپورٹ مطابق دنیا دے لگ بھگ ہر مُلک وچ زنانیاں نال ماڑا ورتا ودھدا جارہیا اے تے غریباں وچ 70 فیصدی زنانیاں ہین۔ رپورٹ دے مطابق دنیا دی کُل کارآمد بھوئیں دا صرف اک فیصدی ای زنانیاں دے ناں درج اے۔ ایہہ رپورٹ اقوام متحدہ دے ہیومن رائٹس کمیشن دے لوئیز آربر نیںتیار کیتی اے۔
اوہناں دا آکھنا اے کہ ویاہی وری زندگی وچ عورتاں دے نال جبری زنا اجے وی جاری اے تے 53 مُلکاں نے اجے تائیں ایہنوں جُرم نہیں منیا ہے۔ رپورٹ کیہندی اے کہ اقوام متحدہ دے 185 ممبر مُلکاں نے وعدہ کیتا سی کہ اوہ 2005 ء تیک اوہناں ساریاں قنوناں نوں ختم کر دیون گے جیہڑے مرداں دے حق وچ جاندے نیں لیکن ایس توں اڈ عورتاں نال دوجے درجے دا ورتا ہورہیا اے۔
رپورٹ تیار کرن وچ مدد کرن والی فریڈا بانڈا نے صحافیاں نوں دَسیا کہ طلاق، زچگی الاؤنس تے پینشن توں جڑے قانون عورتاں نال انصاف نہیں کردے ہین۔
اوہناں نے وکھووکھ مُلکاں وچ ویاہ لئی کُڑیاں نوں جائز ویاہن عمر حداں اُتے تبصرہ کردے ہوئیاں کیہا " کئی مُلکاں وچ کُڑیاں تے مُنڈیاں واسطے ویاہ دی گھٹ توں گھٹ عمر وکھری ہے جتھے کُڑیاں دی عمر دی حد ہیمشاں گھٹ رکھی جاندی اے۔"
بانڈا دا کہنا ایں کہ " مثال دے طور تے جیکر کسے کُڑی دا ویاہ 14 ورھیاں وچ ہندا ہے تاں اوس دی پڑھائی تے اثر پیندا اے تے نالے چھیتی ای نیانے جم جاندے نیں۔
رپورٹ دے مطابق جگتی انسانی حقاں دے قانوناں دا ہر مُلک وچ آدر نہیں کیتا جارہیا اے۔
