کیرالہ ریاست دی پاروتی امونا کوٹین نوں سن دوہزار اٹھ لئی مس انڈیا چنیا گیا ہے۔ اوہناں دے نال ممبئی دی مونڈی کو فیمنا مس انڈیا یونیورس تے گوا دی ہرشیتا سکسینہ نوں مس انڈیا ارتھ چنیا گیا۔
ایس مقابلے دا ناں فیمینا حسن مقابلہ ہے تے پورے ملک دیاں سوہنیاں ایس وچ حصہ لیندیاں ہین تے ایس مقابلے وچ جتن توں مگروں ہی اوہ عالمی حسن دے مقابلے لئی چنیاں جاندیاں ہین۔
ایہہ مقابلہ ہفتے دی شام ممبئی دے اندھیری سپورٹس کامپلیکس وچ ہویا تے ایس وچ اٹھائی سوہنیاں نے حصہ لیا جہناں وچوں تن چنیاں گیاں۔ ایس موقعے تے بالی وڈ ہیروئین کرینہ کپور بپاشا باسو تے سمیرا ریڈی نے ناچ وی وکھایا۔
ہندوستان وچ حسن دا مقابلہ ایس لئی اہم منیا جاندا ہے جو چنی جان والی ہر سوہنی بالی وڈ وچ اپنی قسمت ضرور ازماؤندی ہے۔ گذریل چنیاں حسیناواں وچوں ایشوریا رائے، سشمیتا سین، پریانکا چوپڑا تے دیا مرزا پہلاں ہی فلماں دیاں مشہور ایکٹرساں بن چکیاں ہین۔
ایس مقابلے دا تاج کرینہ کپور نے پوایا۔ جج دا فرض قطرینہ کیف تے تبو نے پورا کیتا تے دیا مرزا نے سٹیج سیکرٹری دا۔
