فروری سن دو ہزار چھ دا اک دن رینو دے دل تے دماغ تے ہی نہیں جسم اُتے وی نقش ہے۔اُس دیہاڑ اوہ مشرق دلی وچ اپنے گھر دے باہر مجھاں نوں نوا رہی سی کہ اُس دے پیو دا کرایے دار اوہدے کول آیا۔ اُس دے ہتھ وچ اک مگا سی۔ رینو نے سمجھیا پانی چاہی دا ہے پر کرایے دار نے ویکھدیاں ہی ویکھدیاں اوہدے مونہہ تے تیزاب ڈول دتا۔ رینو دی بھین رجنی چیک چیاڑا سن کے باہر نسی۔ اوہ کہندی ہے جو تیزاب دے اثر نال رینو دے کپڑے پلاسٹک وانگوں پگھر رہے سن'۔
تیزاب اینا زہریلا سی کہ رینو دا مونہہ بوہت بھیڑی طراں سڑ گیا تے دوہواں اکھاں دی بینائی ہمیش لئی مک گئی۔ رینو نے گیاراں سال پہلاں اپنی ماں دے مرن توں مگروں اپنے نکلے بھین بھراواں نوں ماں وانگوں پالیا سی پر اک ہی لمحے وچ اوہناں دی حیاتی بدل گئی۔ ہن نکے بھین بھرا اوہناں دی ویکھ بھال کردے ہین۔
ہندوستان، پاکستان تے بنگلہ دیش وچ تیزاب دے دھاڑے دے واقعے ودھ رہے ہین۔ اہناں دھاڑیاں دا شکار بنن والیاں زنانیاں دا تعلق عام طور تے سماج دے غریب طبقے نال ہندا ہے۔ اوہناں وچوں بوہتیاں اوہ ہندیاں ہین جنہاں دے اپنے خاونداں نال تعلق خراب ہو گئے ہوون یاں پھیر اوہناں نے کسے مرد دیاں چاہواں ساہمنے نیون توں انکار کر دتا ہووے۔
تے عام خیال دے الٹ دھاڑے وقتی جنون وچ نہیں سگوں بوہت سوچ سمجھ کے کیتے جاندے ہین۔ دھاڑا کرن والیاں دا سُنیہا صاف ہندا ہے '' جے توں میری نہیں ہوسکدی تے کسے ہور دی وی نہیں ہو سکدی۔
واقعے توں مگروں سڑے ہوئے مونہہ نال زندگی گزارنی کنا اوکھا تے کنیاں اوکھتاں ویکھنیاں پیندیاں ہین، ایس دا گویڑ کوئی اوکھا نہیں۔ انج دے دھاڑے توں مگروں اک سکول ٹیچر نوں نوکری چھڈنی پئی کیوں جو نیانے اوہناںنوں ویکھ کے ڈر جاندے سن۔ چوکھے لوک انج دیاں زنیاں نوں واپس نوکری دیون توں وی کتراوندے ہین۔
ایس صورتحال وچ زنانیاں دا قومی کمیشن تیزاب دا شکار ہوون والیاں لئی اک طبی سکیم شروع کرن دے امکاناں دا جائزہ لے رہیا ہے۔پلاسٹک سرجری نال بوہت سارے متاثراں نوں چنگی زندگی دتی جاسکدی ہے پر ایہہ علاج بوہت مہنگا ہے تے سب تھاواں تے نہیں ہوندا۔
انج دے حملیاں دیاں خبراں تے اخباراں وچ آوندیاں رہندیاں ہین پر کوئی بیمہ یاں امدادی سکیم تے دور کسے دے کول دھاڑیاں ولوں صحیح گنتی وی نہیں ہے۔
کرناٹک وچ اک غیر سرکاری ادارے نے ایس پاسے پیش قدمی کردیاں ہوئیاں تیزاب دے دھاڑیاں دے چھونجاہ واقعیاں دی لسٹ جاری کیتی ہے تاں جو ایس ولوں لوکاں نوں خبردار کیتا جا سکے۔تیزاب دے دھاڑیاں دے کئی ملزم معمولی سزا دے نال چھٹ جاندے ہین یاں پھیر عدالتاں وچ ورہیاں مقدمہ چلدا رہندا ہے تے اوہ ضمانت تے آزاد گھمدے ہین۔
انسانی حقاں دی ستھ ہیومن رائٹس نیٹ ورک موجب انج دے واقعیاں وچ سخت سزاواں دتے جاون دی لوڑ ہے۔ اوہناں دی ایہہ منگ وی ہے جو ہٹیاں تے تیزاب ویچنا بند کیتا جاوے۔پر بعضے لوکاں دا خیال ہے جو ایہہ مسئلے دا حل نہیں۔ اوہ آکھدے ہین جو ہندوستانی مرد کدوں ایہہ گل سمجھن گے جو زنانیاں دے وی اپنے حق تے پسند ناپسند ہندی ہے'۔
جدوں تیکر سماج وچ ایہہ بدلی نہیں آوندی زنانیاں تے انج دے دھاڑے روکنا بوہت اوکھا ہووے گا۔
