پیو نے دھی نوں تہہ خانے وچ بند کر کے اوس چوں 7نیانے جم دتے

آسٹریا وچ اک 73ورھیاں دے بندے نوں ایس شک وچ پھڑیا گیا اے جو اوس نے اپنی دھی نوں 24ورھے تہہ خانے وچ بند کیتی رکھیا تے اوس وچوں7بال جمے۔ایہہ گل اودوں سامنے آئی جدوں اک نیانی کڑی کرسٹین بیمار ہو گئی تے اوس نوں ہسپتال لے جانا پیا۔

ایہہ زنانی 1984توں گواچی ہوئی سی تے ہُن ایس دی عُمر 42ورھے ہے۔ایس نوں اک نویں جوان کُڑی نال بیماری وچ ہسپتال لیاؤندا گیا۔ایہناں دوہاں زنانیاں دا علاج کیتا جا رہیا اے تے دوجے نیانےاں دا وی خیال رکھیا جا رہیا اے۔

آسٹریا دے صوبے وچ پُلس ایس کولوں پُچھ پرتیت کر رہی اے۔ایس مشکوک بندے دا ناں جوزف ایس اے تے اوس نوں اپنی دھی دے اغوا دے شک وچ پھڑیا گیا سی پر اوس نے اجے تیکر اپنے اُ تے لگن والے الزام دا جواب نہیں دتا۔پُلس نوں شک اے جو اوہناں نیانیاں وچوں اک دی موت جمدیاں سمے ای ہو گئی سی۔ایہناں بالاں وچوں 19ورھیاں دی کُڑی سنے 3 اپنی ماں دے نال ای تہہ خانے وچ بند سی جد کہ باقی 3اپنے دادا دادی نال رہندے پئے ہین۔ایس گل دا نکھیڑا کرن لئی جو واقعی جوزف ایہناں بالاں دا پیو اے ایہناں بالاں دا DNAٹیسٹ کیتا جاوے گا۔

پولیس دا کہنا ہے جو پیو نے اپنی دھی نال گیاراں سالاں دی عمر توں جبر کرنا شروع کیتا تے جد اوہ چوی سال دی ہوئی تے اوس نوں چکر دے کے تہہ خانے وچ لے گیا۔ اوتھے اوہنوں نشے والیاں شیواں کھوایاں تے اوس نوں قید کر دتا۔ پھیر اوس وچوں ست نیانے جمے۔ پہلے تن نیانے اک نوٹ نال اپنے باہرلے بوہے تے چھڈ دتے۔ نوٹ وچ دھی ولوں لکھیا گیا سی جو اوہ نیانیاں دی سنبھال نہیں کر سکدی تے نانا نانی پال لین۔ ایس لئی وڈھے تن نیانے جوز تے اوس دی بیوی روزمیری نے پالے۔

باقی تن نیانے اپنی ماں نال ہی رہے تے پولیس دے چھاپے توں بعد اوہناں پہلی واری زندگی وچ دن دا چانن ویکھیا۔ کہیا جاندا ہے جوزف دی بیوی روزمیری نوں کدی ایس گل دا پتہ نہیں لگا۔