بہار دے مشرقی چمیارن ضلع دے رامگڑھوا پنڈ دی سشما کماری اپنے ویاہ دا فنگشن مکن تے جدوں سوہرے جاون والی سی کہ فون دی گھنٹی وجی تے سُنیہا آیا ہے کہ سکول آونا ضروری ہے۔ ووہٹیاں والے جوڑے وچ انج ہی سوہرے جاون توں پہلاں کتھے ہور جانا اک عام خاوند خورے ہی جھلے پر سشما دے خاوند ارون کمار اوجھا نوں کوئی اعتراض نہیں سی۔ سشما نے ویاہ دا فنگشن مکن توں مگروںسدھے ٹریننگ سنٹر اپڑ کے پہلے دن دی تربیت لئی تے پھیر سوہرے گئی۔ پھیر دوجے دن وی سوہریوں ٹریننگ سنٹر تے اپڑ گئی۔
عام حالات وچ کسے مرد ولوں انج دے کھلے دل دی مثال گھٹ ہی ملے گی پر بہار وچ اجکل ایہہ فراخدلی سشما تیکر محدود نہیں سگوں ریاستی حکومت دے اک فیصلے نال کڑیاں دا سماجی رتبہ اینا ودھیا ہے کہ ہر دوجے محلے وچ سشما دے نال ورتی گئی نرمی دی مثال بن جاوے گی۔
ریاستی حکومت نے عورتاں نوں سیاسی طور تے مقتدر کرن لئی پنچایتاں تے بلدیاتی چوناں وچ پنجاہ فیصد سیٹاں اوہناں لئی رکھیاں۔ اس توں وکھ ڈھائی لکھ استاداں دی بھرتی وچ وی زنانیاں دا کوٹہ پنجاہ فیصد کر دتا گیا تے ایسے کارن وڈی گنتی وچ جوان کواریاں کڑیاں نوںسرکاری نوکریاں ملیاں ہین۔
کیوں جو بہار وچ حالی ویاہ دا سماں ہے ایس لئی ویاہواں وچ اہناں کڑیاں دی عزت ویکھی جاسکدی ہے جیہڑیاںٹیچر دے طور تے بحال ہوئیاں ہین۔پٹنہ وچ میرج بیورو چلاون والی پریہ راج کہندی ہے ' پہلاں منڈیاں لئی رشتے دے اشتہار وچ ویکھیا جاندا سی کہ منڈا برسرروزگار ہے یاں نہیں ہن کڑی والے فخر نال اعلان کردے ہین کہ کڑی کماوندی ہے'۔ پریہ راج موجب اہناں سالاں وچ کڑیاں دی ٹیچر دے عہدے تے بھرتیاں وڈے پیمانے تے ہوئیاں ہین ایس لئی انج دے اشتہار بوہتے آئے ہین۔ ایس توں وکھ آنگن باڑی خادمہ تے ہیلتھ ورکر دے طور تے وی کڑیاں نوں واہوا نوکریاں ملیاں ہین۔
اک اخبار وچ اشتہار شعبہ دے مینجر رام بابو شاہی آکھدے ہین کہ ضرورت رشتہ دے اشتہار وچ نوکری والیاں منڈیاں دے تناسب وچ کڑیاں دی گنتی ودھی ہے۔ پٹنہ یونیورسٹی دے شعبہ سماجیات دے صدر پروفیسر سرفراز احمد کہندے نیں کڑیاں دا نوکری والیاں ہونا ویاہ دی مارکیٹ وچ اک پلس پوائنٹ بن گیا ہے۔
احمد موجب ' ودھدی ہوئی مہنگائی وچ ہر کوئی پیسہ کماون والی نونہہ چاہندا ہے پر ایس دی اک ہور وجہ کہ ٹیچرنونہہ سماجی طور تے وی عزت دا کارن بن دی ہے۔ پروفیسر احمد موجب نوکری والی کڑی دا رتبہ پہلوں وی سی پر اوہناں دی گنتی گھٹ ہوندی سی تے اوہ بوہتا سماج دے اُچے طبقے تیکر محدود سن۔
اوہ ہور کہندے نیں ' نوکریاں کرن والیاں کڑیاں اک پاسے سوہریاں لئی سماجی رتبے دی گل ہوندیاں ہین تے دوجے پاسے داج دی لعنت توں پریشان ماں پیو لئی سکون ہوندیاں ہین کیوں جو کئی انج دیاں کڑیاں بغیر داج توں وی قبول کرن دے قابل ہوندیاں نیں۔'
بہار وچ سماجی بدلی تے نظر رکھن والے صحافی شری کانت کہندے نیں کہ عام طور تے زنانیاں دی پچھان مرداناں نال ہوندی ہے کہ فلاں زنانی فلاں صاحب دی گھر والی ہے، بہار وچ ایہہ معاملہ پٹھا ہو رہیا ہے۔
شری کانت موجب ' ہن مرد آپنا تعارف کسے ٹیچر یاں مکھیا دا شوہر دسن وچ فخر محسوس کردا ہے۔ ایسے پاروں بہار وچ ' مکھیا پتی' دے شوہر ورگے ناں پے رہے ہین '۔
