مائی سوہنی نوں ماواں دے عالمی دیہاڑے دا تے کجھ پتہ نہیں پر اوہ کہندی ہے کہ اکلاپے وچ اوہناں دیاں اکھاں بھر آوندیاں ہین جدوں اوہناں نوں اپنے اوہ تن نیانے چیتے آوندے ہین جیہڑے اوہناں نے غریبی دی وجہ توں پیدا ہوندیاں ہی اک بے اولاد جوڑے نوں دے دتے سی۔
چھیالی سالاں دی مائی سوہنی نوں اپنی ستائی سالاں دی ویاہی زندگی وچ چوداں نیانیاں دی ماں بننا پیا۔ اوہناں دا خاوند رکشا ڈرائیور سی پر مگروں اوہ ہیروئین دے نشے دے عادی ہو گئے۔ مائی سوہنی بوہت غریبی وچ نیانیاں سنے کلیاں رہ گئیاں۔
مائی سوہنی کہندیاں ہین کہ جدوں اوہ حاملہ ہو جاندیاں سن تے نیانے دے جمن دا ویلا نیڑے آوندا سی اودوں اوہ اک بے اولاد میاں بیوی نوں لبھ لیندیاں سی۔ مائی سوہنی موجب اوہ اوہناں توں کوئی پیسے تے طلب نہیں سن کردیاں پر اوہناں کولوں صرف علاج تے ہسپتال دا خرچہ منگدیاں سی۔
نیانہ جمن توں مگروں میرے کول بس اک دن ہی رہندا سی۔ مینوں اپنی ممتا یاں نیانے تے میری زندگی وچوں کسے اک نوں چننا پیندا سی۔ زندگیاں بوہتیاں عزیز سی ایس لئی روندیاں ہوئیاں اپنے نیانے دوجیاں دے حوالے کردی رہی۔'
مائی سوہنی نے دسیا جو اوہ گھراں وچ کم کردی رہی تے چار نیانے اوہناں اپنے کول رکھے، تن دوجیاں نوں دے دتے جدوں کہ ست خوراک نہ ملن دی وجہ توں نکیاں ہوندیاں ہی مر گئے۔
مائی سوہنی فیملی پلاننگ نوں سوات دے مولوی وانگوں وڈا گناہ سمجھدیاں رہیاں۔ اوہناں دی نظر وچ جیہڑی زنانی نیانیاں وچ وقفہ کرے گی اُس دی نماز جنازہ وی جائز نہیں۔ مائی سوہنی نے اپنی بیٹھک والے کمرے وچ رازداری نال دسیا کہ جدوں اوہناں دے خاوند نے اوہناں کول آونا چھڈ دتا اودوں نیانے بند ہو گئے۔ سمجھ گئے نا، مائی سوہنی نے سر ہلاوندیاں ہوئیاں کہیا۔
مائی سوہنی دے دن بلدیاتی چوناں توں مگروں بدل گئے۔ اوہ اپنے ساکاں تے محلے والیاں دی مدد نال یو سی دس سکھر دی جنرل کونسلر چنیاں گئیاں۔ اک ساک نوں اپنے پینل لئی کسے زنانی دی لوڑ سی، اوہناں مائی سوہنی نال گل کیتی تے مائی نے ہاں کر دتی۔ کونسلر بنن توں مگروں مائی سوہنی دی غربت کجھ گھٹی ہے۔
مائی نے دسیا کہ ہن اوہناں نوں اپنے اوہ تن نیانے بوہت یاد آوندے ہین جیہڑے اوہناں نے غریبی دی وجہ توں اپنے توں وکھ کیتے سن۔ اوہناں وچ دو پتر تے اک دھی شامل ہے۔
مائی سوہنی دا کہنا سی کہ غریبی دے دن سی، اوہ بدل گئے ہن کجھ ساہ لے سکنی ہاں پر غریبی دی وجہ توں جے میں جسم ویچن دا دھندا شروع کر دیندی تے اوہ عزت کدی نہ ملدی۔مائی سوہنی نے دسیا کہ مرداں دیاں نظراں توں بچن لئی اوہناں نے کدی ہار سنگہار نہیں کیتا۔ اوہ نویں کپڑے پاون توں مگروں اپنے رشتے داراں توں وکھ کِتے نہیں جاندیاں سی۔
مائی سوہنی نے اپنے نشئی شوہر توں طلاق لے لئی ہے تے اوہناں دی نشے دی عادت چھڈاون لئی کونسلر بنن توں مگروں دس مہینے جیل وچ وی بند کروایا پر اوہ اپنی عادت نہ بدل سکیا۔
مائی سوہنی نوں کسے معجزے دی اُڈیک تے نہیں او تن نیانے اوہناں نوں واپس مل جاون پر اوہ کہندیاں ہین اوہناں نوں نیانیاں دی یاد آوندی ہے تے اکلاپے وچ جدوں کوئی نہیں ہوندا تے اوہناں دی لمی عمر لئی دعاواں کردی رہنی ہاں جیہڑے میرے نیانے ہوندے ہوئے وی میرے نہیں ہین۔
