ہندوستان ماواں دے رہن لئی کوئی چنگی تھاں نہیں ہے۔ اک عالمی سروے جیہدے وچ ایہہ ویکھیا گیا سی کہ کیہڑی تھاں تے ماواں سوکھالیاں ہین تے کتھے اوکھیاں،گھٹ ترقی کیتے ملکاں وچ ہندوستان دا نمبر 71 ملکاں وچوں 66واں ہے۔ ایس توں بھور اک چنگے ملکاں وچ سوئٹزرلینڈ، پوپاؤ نیو گنیا اتے نائیجیریا ہین۔جتھے ہندوستان دے گوانڈھی ملکاں وچوں چین دا نمبر اہناں ملکاں وچ پندرھواں ہے اوتھے پاکستان 69 ویں نمبر تے اوہناں پنج ملکاں وچ ہے جتھے حال ہندوستان نالوں وی بھیڑا ہے۔ بنگلہ دیش دا نمبر تیرہواں ہے تے نیپال گیارہویں نمبر تے ہے۔
امریکہ دی انسانی حقاں دی اک ستھ ولوں 2008 وچ دتی گئی ایس رپورٹ وچ دسیا گیا ہے کہ ہندوستان وچ ہر 70 ماواں وچوں اک ماں جنیپے ویلے مر جاندی ہے جدوں کہ چین وچ ہر 1300 وچوں اک ماں جنیپے ویلے مردی ہے تے پاکستان وچ ہر 74 وچوں اک۔ رپورٹ وچ ایہہ وی پتہ لگا ہے کہ ہندوستان وچ 53 فیصدی ماواں نوں جنیپے ویلے تجربے کار دائیاں یاں ڈاکٹر نہیں لبھدیاں۔
رپورٹ وچ دسیا گیا ہے کہ گھٹ ترقی کیتے ملکاں وچ ہر سال 50 ملین زنانیاں گھراں وچ بنا کسے تجربے کار دائی دے بچے جمدیاں ہین تے اہناں وچوں پنج لکھ تیتی ہزار زنانیاں جنیپے ویلے مر جاندیاں نیں۔ جدوں ماں مر جاندی ہے تے بچے دے مرن دا چانس وی تن توں دس گنا ودھ جاندا ہے۔ ہر سال چار ملین نویں جمے بال مر جاندے نیں۔جدوں ماواں غریب، ان پڑھ تے صحت دیاں سوکھتاں نہ لے سکدیاں ہوون تے اوہناں تے اوہناں دے بالاں دے مرن دا چانس کئی گنا ہور ودھ جاندا ہے۔
