موگا، ١٩ مئی (جسپال سنگھ ببی، سرندرپال سنگھ) اج موگا شہر وچ اس ویلے انسانیت شرمسار ہو گئی جدوں پولیس ولوں انصاف نہ دتے جان تے جبر زنا دی شکار اک زنانی نوں آپنے کپڑے لاہ کے روس وکھالا کرن لئی مجبور ہونا پیا۔ ایتھوں نیڑلے پنڈ گھل کلاں دی زنانی پرمجیت کور ، جس نال کجھ دن پہلاں تن بندیاں ولوں جبر زنا کیتا گیا سی، ولوں وار وار پولیس اہلکاراں کول ملزماں خلاف کاروائی دی شکایت کیتی گئی پر پولیس نے کوئی وی کاروائی نہ کیتی۔ پرمجیت کور نے مایوس ہو کے پولیس نوں کجھ دن پہلاں خبردار کیتا کہ جے اس نوں انصاف نہ دتا گیا تاں اوہ ننگیاں ہو کے ڈی سی دفتر تک روس وکھالا کرے گی۔ اہلکاراں ولوں اس دی دھمکی نوں ان گولیا کرن تے اج اس نے مکھ چوک نیڑے تھانہ سٹی ١ کول پولیس اہلکاراں دی موجودگی وچ سرعام کپڑے لاہ کے روس وکھالا کیتا۔
ایس وچکار انسپکٹر سربجیت سنگھ نے چھیتی کاروائی کردیاں زنانی دے کپڑے پوا کے اس نوں تھانے لے آندا۔ پر اس ویلے زنانہ پولیس دا کوئی پربندھ نہیں سی۔ متاثرہ عورت پرمجیت کور نے دسیا کہ ١٠ دن پہلاں رات نوں میرے جیٹھ دا مُنڈا تے اس دے دو بیلی میرے گھر آئے تے میرے نال دھگانا کیتا۔ اوہناں اس دی نکی دھی نال وی چھیڑچھاڑ کیتی۔ اس نے کیہا کہ ٩ مئی نوں رات نوں میں سول ہسپتال داخل ہوئی اتے لیڈی ڈاکٹر نے میڈیکل کرن تے تھانہ صدر وچ رپورٹ کیتی پر مینوں انصاف نہیں ملیا۔ ١٨ مئی نوں میرے جیٹھ دا مُنڈا پھیر آپنے ساتھیاں نال آ دھمکیا تے پھیر دھگانا کیتا۔ اس نے دسیا کہ "میرے ٤ بچے ہن میں آپنے گھر والے توں وکھری رہندی ہاں۔" اوہنے کہیا کہ پولیس ولوں اس نوں انصاف نہ دتے جان کارن اوہنے آپنے کپڑے لاہ کے انصاف دی دہائی دتی ہے۔
زنانی نال دھگانا کرن والیاں خلاف مقدمہ درج
شام ویلے ملی جانکاری موجب انصاف لین لئی کپڑے لاہ کے روس وکھالا کرن والی عورت پرمجیت کور خلاف اج موگا دے تھانا سٹی١ وچ فحاشی پھیلاؤن تے دفعہ ١٨٩، ٢٩٤، ٥٠٦ ہیٹھ مقدمہ درج کر لیا گیا ہے۔ ایس معاملے دی تفتیش اے ایس آئی بلوندر سنگھ کر رہے ہین۔ جدوں کہ دوجے پاسے پرمجیت کور دے بیاناں تے تھانہ صدر وچ کرپال سنگھ عرف سونی پتر رنجیت سنگھ، چھندر سنگھ عرف گوری پتر کرنیل سنگھ واسی دوویں گھل کلاں خلاف زنا دا مقدمہ نمبر ٥٩ دفعہ ٣٧٦، ٣٢٤، ١٢٠ بی ہیٹھ درج کر لیا گیا ہے۔
