ہندوستانی زنانیاں باہروں پرتے نال ویاہ کرن لئی راضی نہیں
وچار ڈیسک
June 3rd, 2008
ودھیا نوکریاں، آزادی دی حیاتی، اپنے ٹبر دی سیوا۔ ایہہ کجھ وجہاں ہین جیہناں پاروں ہندوستان وچ چنگیاں نوکریاں یاں کاروبار کردیاں زنانیاں باہروں آئے ہندوستانیاں نال ویاہ کروا کے دیس توں باہر جاون لئی راضی نہیں ہین۔ تے ایہدے پاروں باہروں آئے ہندوستانی لاڑیاں دی منگ گھٹ گئی ہے جیہناں دی کدی ویاہ دی منڈی وچ بڑی منگ ہوندی سی۔
میک اپ تے وال کٹن دی ماہر سواتی گپتا دا آکھنا ہے کہ اوہ بینگلور نوں چھڈ کے ہندوستان نوں باہر نہیں جانا چاہوندی۔ ''ایہہ تے ہو ای نہیں سکدا کہ میں بینگلور نوں چھڈ جاواں۔ میں ایتھے چنگی نوکری کر رہی ہاں۔ میں ایہہ سارا کجھ کسے باہروں آئے ہندوستانی لئی نہیں چھڈ سکدی''۔ کاروبار توں اڈ وی سواتی ایتھے اپنے ماپیاں دی سیوا لئی رہنا چاہوندی ہے۔ اوہدا آکھنا ہے کہ ''میں چاہوندی ہاں کہ کجھ ورھیاں مگروں میرے ماپے سیر سپاٹا کرن تے میں پچھوں گھر باہر سمھالاں۔ ایس لئی میں کسے بینگلور دے بندے نال ای ویاہ کراں گی''۔
میڈیا سروس کمپنی وچ کم کردی سونیا وی اپنے ٹبر پاروں ای کسے باہروں آئے ہندوستانی نال ویاہ نہیں کرنا چاہوندی۔ اوہدا آکھنا ہے کہ ''ایس توں اڈ اوس بندے نال ویاہ کرواؤنا خطرے والی گل ای ہے جیہڑا ہزاراں کوہاں توں آیا ہووے۔ کسے اُکا ای ان پچھاتے بندے نال پرنائے جاون وچ سدا ای خطرہ رہندا ہے۔''
ہری بابو انجام اک رشتے کرواؤن والی کمپنی چلاؤندا ہے۔ اوہندا آکھنا ہے کہ چنگیاں نوکریاں پاروں کڑیاں باہروں پرتے ہندوستانیاں وچ کوئی موہ نہیں رکھدیاں۔ کڑیاں چنگیاں نوکریاں کردیاں ہین تے اوہناں نوں واہوا تنخواہ لبھدی ہے۔ اوہ کسے باہروں پرتے بندے لئی ایہہ سارا کجھ چھڈن لئی راضی نہیں جیہڑا کدی ایتھے رہیا ای نہیں۔
اُوشا اک آئی ٹی کمپنی وچ کم کردی ہے اوہدا آکھنا ہے کہ ''میرے وچ اینی ہمت نہیں کہ میں اپنی نوکری چھڈ دیواں تے اوس بندے نال ویاہ کروا کے باہر چلی جاواں جیہڑا اوتھے کجھ وی نہیں کردا۔ میں ایتھے وی ویاہ کروا سکدی ہاں کیوں جے ایہہ جانی پچھانی تھاں ہے تے کل کلاں نوں کوئی گل ہو جاوے تے میں فیر اپنی نوکری تے پرت سکدی ہاں۔
ایس توں اڈ ویلا یادیو جیہڑے اک رشتے کرواؤن والی کمپنی چلاؤندے ہین، دا آکھنا ہے کہ جیہڑیاں زنانیاں انٹرنیٹ تے رشتے بھالدیاں ہین اوہناں دی کوشش ہندی ہے کہ کسے باہر وسے ہندوستانی نال ویاہ ہو جاوے۔ ایہہ خطرناک گل ہے۔ کیوں جے تن چار مہینیاں مگروں اوہناں نوں پتہ لگدا اے جی ایہہ بندہ چنگا نہیں سی تے اوہ طلاق منگن لگ پیندیاں نیں۔ باہر وسدے ہندوستانیاں دے ویاہ توں پہلوں وی کئی معاشقے ہندے ہین جدوں اوہ اوہناں وچ ناکام ہو جاندے ہین تے اوہ کسے ہندوستانی کڑی نال ویاہ کرن آ جاندے ہین۔ نالے اوہ اپنے کاروبار یاں تنخواہاں بارے وی جھوٹھ ای بولدے نیں۔ کئی بندے بھارے قرضیاں ہیٹھ دبے ہوندے نیں تے اوہ داج دی منگ کردے نیں۔ کوئی وی سمجھدار ہندوستانی زنانی ایہو جہے کسے بندے نال ویاہ کرواؤن لئی راضی نہیں ہووے گی۔''
