لہور وچ گوالمنڈی دی اک مسیت دے مولوی دے پُتر نے اپنے اک بیلی دے نال رل کے مسیت دے اُتے بنے چبارے وچ اک دس ورھیاں دی کڑی نال جبر زنا کیتا۔ پولیس دا آکھنا ہے کہ کڑی نے زنا کرن والیاں وچوں مولوی دے پُتر ایاز نوں پچھان لیا ہے۔ پولیس نے مسیت دے مولوی نوں پھڑ لیا ہے۔
کڑی دی ماں نے دسیا کہ اوہنے اپنی دھی نوں باہر سودا لین لئی گھلیا سی۔ جدوں کڑی واہوا چر گھر نہ پرتی تے اوہدا پیو اوہنوں لبھن لئی گیا پر کڑی نہ لبھی۔ تے فیر ادھے گھنٹے مگروں کڑی گھر آئی تے اوہدے کپڑے رت نال بھرے سن تے آؤندیاں ای اوہ بے سُرت ہو گئی۔ کڑی دے ماپے اوہنوں میو ہسپتال لے گئے تے اوہناں نوں دسیا گیا کہ کڑی نال جبر زنا کیتا گیا ہے۔
گوالمنڈی پولیس دا آکھنا ہے کہ کڑی نے دسیا ہے کہ مجرماں کول مسیت دے اُتلے چپارے دیاں چابیاں ہین۔ کڑی دے ایس بیان نال مجرم نوں پھڑن وچ سوکھت ہو گئی کیوں جے مسیت دیاں چابیاں مولوی کول ای ہوندیاں نیں۔
وسیلیاں دا آکھنا ہے کہ ہسپتال وچ زنانیاں نے پولیس دے خلاف نعرے مارے۔ اک مریض زنانی نے اک وڈے افسر دی بے عزتی وی کیتی کیوں جے اک ہفتہ پہلوں وی گوالمنڈی دی اک نو ورھیاں دی کڑی نال اوہدے مامے تے اوہدے اک بیلی نے جبر زنا کیتا سی۔ لوکاں ولوں نعرے مارن مگروں پولیس افسر ہسپتال وچوں نس گئے۔
