اک برطانوی صحافی تے لوکائی حقاں لئی کم کرن والی زنانی یوون رڈلے نے میڈیا نوں دسیا کہ اک پاکستانی زنانی پچھلے چار ورھیاں توں افغانستان وچ امریکہ دے اڈے بگرام وچ قید ہے۔ رڈلے دا آکھنا سی، ''میں اج اوہدی مدد لئی رونی آں۔ اپنے لئی نہیں، اک پاکستانی زنانی لئی جیہنوں نہ کدی میں ملی آں نہ تُسیں۔ اوہنوں امریکیاں نے افغانستان وچ قید کیتا ہویا اے تے اوہنوں امداد دی لوڑ اے۔''
رڈلے نے دسیا کہ اوہنوں پہلی واری ایس زنانی بارے اودوں پتہ لگا سی جدوں اوہنے گوانتاناموبے وچ قید رہے معظم بیگ بارے اک کتاب پڑھی سی۔ اوہناں آکھیا کہ جولائی 1955 وچ بگرام اڈے توں نسن والے چار عرباں وچوں اک نے ٹی وی چینل نوں دسیا سی کہ اوہنے قید وچ اک زنانی دی روون پِٹن دیاں واجاں سُنیاں سن پر اوہنے کدے اوہنوں ویکھیا نہیں سی۔
رڈلے دا آکھنا ہے کہ اوس زنانی دا قیدی نمبر 650 رجسٹر ہے ایس لئی امریکی اوہدی ہوند توں مُکر نہیں سکدے۔ رڈلے نے امریکی فوج کولوں منگ کیتی کہ اوس زنانی نوں فوراً چھڈیا جاوے۔ اوہناں آکھیا کہ سانوں اوہدے بارے کوئی جانکاری نہیں ہے۔ سانوں نہیں پتہ کہ اوہدی ذہنی حالت کیہ ہے، سانوں نہیں پتہ کہ اوہدے تے کنا ظلم کیتا گیا ہے۔
اوہناں آکھیا کہ لہندے دی کسے زنانی نال ایہہ کدے نہیں کیتا گیا۔
طالبان نے رڈلے نوں 2001ء وچ بنا کاغذاں دے افغانستان وچ وڑن تے پھڑیا سی تے فیر 11 دیہاڑیاں دی قید مگروں چھڈ دتا سی۔ فیر 2003ء وچ اوہنے اسلام قبول کر لیا۔ رڈلے دے میڈیا نال گل کرن ویلے تحریک انصاف دے چیئرمین عمران خان وی اوہناں دے نال سن۔ عمران خان نے پیپلز پارٹی دے سرکار کولوں منگ کیتی کہ اوہ امریکہ کولوں ایس زنانی بارے جانکاری لوے۔
عمران خان دا آکھنا ہے کہ ایہہ زنانی ڈاکٹر عافیہ صدیقی ہو سکدی ہے جیہنوں کجھ ورہیاں پہلوں اک پاکستانی ائرپورٹ توں پھڑیا گیا سی۔ اوہناں آکھیا کہ کسے نوں وی غیر قانونی طور تے قیدی رکھنا لوکائی حقاں دے خلاف ہے۔ خارجہ دفتر نے کسے وی پاکستانی زنانی دے قیدی ہوون دی گل نوں رد کر دتا ہے۔ خارجہ دفتر دے بلارے دا آکھنا ہے کہ اس الزام دی پچھ پرتیت کیتی جاوے گی۔
