رتو ڈیرو دے نیڑے کارو کاری دے پھڈے وچ جرگے دے فیصلے موجب دھگانے کارو متھے جاون والے گھبرو دیاں دو بھتیجیاں ونی کر کے جرگے دے وچ ای دوہاں دے نکاح کر کے ٹور دتا گیا۔ نال ای ڈیڈھ لکھ جرمانے تے پنڈوں کڈھن دی سزا وی سنائی گئی۔
تفصیل موجب اک مہینہ پہلوں رتو ڈیرو دے نیڑے شرگوٹھ وچ اک جوان زنانی زاہدہ خاتون نوں کارو کاری دے الزام وچ قتل کر دتا گیا سی۔ پیر دے دیہاڑے شر برادری دے وڈیریاں رانو خان شر، قلندر بخش شر، میر جان شر تے علن خان شر دی پردھانی وچ ایس قتل بارے جرگہ ہویا۔
جرگے وچ قتل ہوون والی کڑی دے پیو محمد مٹھل شر تے کارو دا الزام لگن والے گھبرو اسد اللہ شر دے وڈے بھرا ارباب علی شر کولوں بیان لئے گئے۔ مگروں مرن والی کڑی زاہدہ نوں کاری تے منڈے اسد اللہ شر نوں کارو متھ دتا گیا۔ وڈیریاں نے اپنا فیصلہ دیندیاں آکھیا کہ کارو متھے جاون والے دیاں دو بھتیجیاں نوں ونی کیتا جاندا اے جدوں کہ ملزم اسداللہ شر نوں ڈیڈھ لکھ ڈنڈ پایا گیا تے دو ورھیاں لئی پنڈ نہ وڑن دی سزا دتی گئی۔
ایس موقعے تے دوہاں دھراں دی رضامندی نال ونی کیتی گئی۔ 10 ورھیاں دی نور جہان اتے اوہدی بھین 11 ورھیاں دی وزیراں دا نکاح قتل ہوون والی کڑی دے دو بھرواں عباس علی شر تے زاہد علی شر دے نال کروائے گئے تے اوسے ویلے ٹور دتیاں گیاں۔ ٹورن ویلے دوہیں بھیناں روندیاں کرلاؤندیاں رہیاں۔
