ہندوستانی سرکار ولوں کیتے جاون والے بھرویں پربندھاں مگروں وی ٹریول ایجنٹاں دا گند پورے چڑھدے پنجاب وچ کھلردا جا رہیا ہے۔ پہلوں تے ایہہ ایجنٹ گھبروں منڈیاں نوں گھیردے سن پر اک نویں رپورٹ توں پتہ لگا ہے کہ ہن اہناں نے کڑیاں ول دھیان دینا شروع کیتا ہے۔ رپورٹ وچ دسیا گیا ہے کہ پنجاب دیاں 600 کڑیاں باہرلے ملکاں وچ مندے حالاں وچ رہ رہیاں ہین۔
لوک بھلیائی پارٹی نے ایہو جہیاں کڑیاں بارے جانکاری اکٹھی کر کے وزیر اعظم منموہن سنگھ نوں گھلی ہے تے آکھیا ہے کہ اوہ اہناں کڑیاں دی مدد کرن تے ٹریول ایجنٹاں دے خلاف کاروائی کرن۔
جگراؤن شہر دی اک کڑی نے اپنی واپری سناؤندیاں دسیا کہ اوہنے ضلع موگا دی اک زنانی ٹریول ایجنٹ نوں باہر جاون لئی دیڈھ لکھ روپئیہ دتا سی۔ سائپرس وچ اوہدے مالکاں نے اوہنوں رنڈی بنا دتا۔ اوتھوں اوہنے لوک بھلیائی پارٹی دے پردھان نوں ٹیلی فون کیتا جیہنے سفارت خانے راہیں اوہدی خلاصی کروائی۔
آدم پور دی اک ہور کُڑی جیہنوں سائپرس توں واپس لیاندا گیا ہے دا آکھنا ہے کہ اوہنوں تن مہینیاں تیکر اوہدے مالک نے اندر تاڑی رکھیا تے اوہناں گاہکاں کول ویچ کے کھٹی کیتی۔
لوک بھلیائی پارٹی دے پردھان بلونت سنگھ رامو والا نے دسیا ہے کہ اوہناں نے سائپرس وچ 400، ملائشیا وچ 200، تے تھائی لینڈ اتے یوکرائن وچ ہور کئی کڑیاں بارے جانکاری اکٹھی کیتی ہے جیہناں نال دھرو ہو رہیا ہے۔ ایہہ ساریاں کڑیاں پنجاب دے ٹریول ایجنٹاں راہیں باہر گئیاں سن۔
پارٹی دا آکھنا ہے کہ اوہناں نے ہن تیکر دس کڑیاں نوں باہرلے ملکاں دے دلالاں کولون چھڈوایا ہے۔ اہناں کڑیاں نوں پنجاب دے ٹریول ایجنٹاں نے نوکریاں دا لالچ دے کے باہر گھلیا سی۔ اک کڑی نے میڈیا نوں دسیا کہ جے کوئی کڑی دلالاں دی گل نہیں منندی تے اوہنوں پھینٹی لائی جاندی ہے۔
