پیسے نہیں خاوند چاہی دا، نیانے ویچن تے مجبور زنانی دی دہائی

حیدر آباد دی وسنیک عائشہ ملک نے کہیا ہے جو بھکھ ، غربت، نیانیاں دے رون کرلان نے مینوں نیانے ویچن تے مجبور کر دتا سی، دولت جائیداد مالی امداد نال مینوں کوئی غرض نہیں مینوں اپنے خاوند زاہد دی رہائی تے تحفظ چاہی دا کیوں جو ساڈے خلاف کاروکاری کرن دی سازش کیتی جارہی ہے تے تڑھیاں لائیاں جارہیاں ہین۔

زاہد نے مینوں ذلت دی زندگی توں چھڈوا کے عزت دی زندگی دتی جیس کارن اج سکھر جیل وچ سڑ رہیا ہے میرے بھرا اوہنوں زہر دے کے مارنا چاہندے ہین اوہ جنگ بیورو حیدر آباد وچ انصار برنی ٹرسٹ انٹرنیشنل دے وائس چیئر مین سید صارم برنی تے ایڈوکیٹ اعجاز خٹک دے نال جنگ نال گل بات کر رہیاں سن۔

عائشہ ملک نے دسیا اوہ ڈیرہ غازی خان دی وسنیک سن ماں تے تناں بھراواں نے صرف اڑی، انا دی خاطر میرا اک ستر سال دے بڈھے حنیف نال ویاہ کروا دتا اودوں باراں ورہیاں دی سی۔شوہر مارا مار دا نشانہ بناوندا سی گھر والیاں نوں کئی وار دسیا پر اوہناں دھیان نہ دتا، خاوند توں اکّ کے تے گھر والیاں توں بے امید ہو کے سوہریاں دا گھر چھڈ دتا تے ڈیرہ غازی خان وچ پندراں ویہہ دن مزار تے رہی تے پھیر ڈیرہ غازی خان دے درالامان وچ پناہ لئی تے اوہدے مگروں کراچی دارالامان ٹر گئی جتھوں عدالت راہیں حنیف کولوں طلاق لئی۔

خلعے دے کئی ورہیاں مگروں زاہد نال رابطہ کیتا تے اوہنوں کہیا اک دولت مند پرمجبور عورت نال ویاہ کر کے اوہنوں تحفظ دے سکدا ایں؟ جیس تے زاہد نے ہاں کیتی تے پھیر گڈیاں وچ دال ویچن والے زاہد نال کراچی وچ کورٹ میرج کر لئی جیس کارن بھراواں نے گھوٹکی پلس راہیں خدا دی وستی وچوں خاوند نوں پھڑوا دتا تے پلس میرے خاوند نوں والاں توں پھڑ کے دھروندی اپنے نال لے گئی پونے دو سال توں شوہر سکھر جیل وچ قید ہے۔

شوہر دی گرفتاری توں مگروں محنت مزدوری کر کے اپنے دوہواں نیانیاں جنید تے علیزہ دا ڈھڈ بھر دی رہی تھوڑا چر سوہرے رہی پر خاوند دے بغیر عورت دی کوئی عزت نہیں ہوندی ہے مالک مکان نے کرایہ نہ دیون تے گھروں کڈھ دتا جیس توں مگروں ہالا ناکہ دے نیڑے درگاہ نانا بابا وچ پناہ لبھی، گھر دی چار دیواری نہ ہوون تے بھکھ غربت توں مجبور ہو کے اپنے پتر نوں لوڑ مند ماپیاں دے حوالے کرن لئی ریشم گلی چلی گئی تاں جو نیانیاں نوں گھر دی چاردیواری لبھ سکے۔