فرانس دے شہر پیرس وچ بینک ڈکیتی دے جرم وچ اک سولاں ورھیاں دی کُڑی نوں پھڑیا گیا ہے جیہدے بارے آکھیا جا رہیا ہے کہ اوہ ایس توں پہلوں علاقے وچ ہوون والیاں ست ہور ڈکیتیاں وچ رلتی ہے۔ سرکاری وکیل نے ایس بارے ہور کجھ نہیں دسیا کہ ڈکیتیاں کیویں ہوئیاں سن تے ایہناں وچ کڑی نے کیہ پاتر نبھایا سی۔
پولیس دا آکھنا ہے کہ ایس کڑی نوں بدھ دے دیہاڑے HSBC بینک دی اک برانچ وچ ڈکیتی توں مگروں پچھ پرتیت وچ پھڑیا گیا سی۔ کڑی کولوں بینک وچوں لُٹے گئے پیسیاں وچوں کجھ پیسے وی پھڑے گئے نیں۔ جدوں پولیس موقعے تے پُجی تے اوہدے نال دے سنگی کار وچ بیٹھ کے نکل گئے۔
پولیس نے ایہہ وی دسیا ہے کہ ایس علاقے وچ پچھلے کجھ ہفتیاں وچ ست بینک ڈکیتیاں ہوئیاں ہین تے ساریاں اکو طریقے نال کیتیاں گئیاں نیں۔ واردات دے طریقے بارے پولیس دا آکھنا سی کہ اک کڑی اکلی بینک وچ بنا نقاب پائیاں وڑدی سی فیر اوہ بندوق کڈھ کے سیکیورٹی والے بوہے کھول دیندی سی تے اوہدے سنگی اندر وڑ جاندے سن جیہناں نے مونہاں تے نقاب پائے ہوندے سن۔
