جرگے نے پیو دے گناہ بدلے چار ورھیاں دی کڑی ویاہون دا حکم دے دتا
وچار ڈیسک
August 2nd, 2008
حیدر آباد وچ جرگے نے کوہلی قبیلے دی چار ورھیاں دی اک کڑی نوں اینی ہی عمر دے اک منڈے نال ویاہون دا حکم دتا ہے۔ کڑی نوں ایہہ سزا اوہدے پیو دے گناہ دے بدلے دتی جا رہی ہے۔ کڑی دا پیو منڈے دی بھین نوں ادھال کے لے گیا سی۔
ٹنڈو الہ یار دے ڈی پی او نے میڈیا نوں دسیا کہ اک صحافی دی خبر نے اوہنے ایس سارے معاملے نوں پھرولیا سی۔ رادھا ناں دی اک جوان کڑی نیلو کوہلی نال اُدھل گئی سی جیہڑا ایس چار ورھیاں دی کڑی دا پیو ہے۔ پر رادھا دے ٹبر ولوں کوئی ایف آئی آر نہیں کٹوائی گئی۔ کوہلی قبیلہ اک لنڈ وڈیرے دے کامے نیں۔ لنڈ وڈیرے نے ٹنڈو الہ یار وچ اک پنچائت سدی تے ایہہ فیصلہ کیتا کہ مینا دا ویاہ رادھا دے چار ورھیاں دے بھرا دھالو نال کر دتا جاوے۔
جمعے دے دیہاڑے روندی کرلاؤندی مینا نوں منڈے دے ٹبر دے ہتھ دے دتا گیا۔ کڑی دی ماں تے دادی نے ڈکن دا واہ لایا پر اوہناں دا وس نہ چلیا۔ ایہہ وی پتہ لگا ہے کہ ویاہ دے کاغذاں تے کڑی دی دادی کولوں دھگانے انگوٹھے لوائے گئے سن۔ کاغذاں تے منڈے دے پیو کارو کوہلی دا انگوٹھا وی لگا ہویا ہے تے لکھیا ہے کہ جیہڑی دھر وی ایس توں مکرے گی اوہنوں دو لکھ روپیئہ ڈنڈ بھرنا پوے گا۔ مینا دی ماں تے دادی دا آکھنا ہے کہ اوہناں نے کوئی لکھت نہیں دتی۔
