القاعدہ نال سانگیاں دے شبہے وچ پنج ورھے پہلوں کراچی وچوں پھڑی جاون والی ڈاکٹر عافیہ نوں پھٹڑ حالت وچ نیویارک دی اک عدالت وچ پیش کیتا گیا جتھے جج نے اوہناں نوں فرد جرم پڑھ کے سنائی پر ڈاکٹر عافیہ نے کمزوری پاروں نانہہ وچ سر ہلا کے اہناں الزاماں نوں رد دتا۔
امریکی جج دے ساہمنے پیشی ویلے ڈاکٹر عافیہ دی صحت بوہت ماڑی لگ رہی سی۔ جدوں اوہ عدالت وچ وڑیاں تے لنگڑا کے سہارے نال چل رہیاں سن۔ جج نے اوہناں نوں کرسی تے بیٹھن دی اجازت دتی تے الزام پڑھ کے سنائے۔ جج نے آکھیا کہ اوہناں تے امریکی فوجی تے گولی چلاؤن اتے اوہنوں مارن دی سازش دا الزام ہے۔
عدالت نے ڈاکٹر عافیہ دی وکیل کولوں پچھیا کہ اوہ ضمانت دی درخواست تے بحث لئی تیار ہین جیہدے تے وکیل صفائی نے آکھیا کہ اوہنے ایہدی تیاری نہیں کیتی۔ جج نے ضمانت دی درخواست دی سنوائی لئی 11 اگست دی تاریخ پا دتی۔
صفائی دی وکیل نے جج نوں عرض کیتی کہ اوہدی موکلہ پھٹڑ نیں جیہدے تے جج نے ڈاکٹر عافیہ دے طبی معائنے اتے اوہناں نوں طبی امداد دیون دی ہدایت کیتی۔ صفائی دی وکیل دا آکھنا ہے کہ ڈاکٹر عافیہ دے خلاف امریکی حکومت دا کیس بڑا ماٹھا ہے۔ امریکی عدالت وچ ڈاکٹر عافیہ صدیقی دے خلاف کیس دی مڈھلی سنوائی 19 اگست نوں ہووے گی۔
ڈاکٹر عافیہ صدیقی اپنے تن بالاں دے نال 30 مارچ 2003 نوں کراچی توں راولپنڈی جاون لئی گھروں نکلیاں سن تے اوہدے مگروں اوہناں دی کوئی اُگ سُگ نہیں ملی۔
