ہندوستانی مسلم زنانیاں نے اپنے حقاں دے کھیتر وچ اک وڈا پیر پُٹیا اے۔ پرانیاں رسماں نوں توڑ دے ہوئے اک مسلمان زنانی نے قاضی دی ذمے واری دا آہر کردیاں اُترپردیش دے دارالحکومت لکھنؤ وچ نکاح پڑھایااے۔ عام طور تے کوئی مرد قاضی اِی نکاح پڑھاؤندا ہے۔
نیشنل پلاننگ کمیشن دی ممبر ڈاکٹر سعیدہ حمید نے منگل دے دیہاڑے قرآن دی مقدس آیتاں پڑھیاں تے ریت رواج موجب لاڑھے تے ووہٹی دا نکاح پورا کروایا۔
ووہٹی نائیش تے لاڑھا عمران علی میڈیا دے ساہمنے قاضی دے نال بیٹھے سن تے دونواں نے سبھ دے ساہمنے نکاح قبول کیتا۔ ایس ویاہ وچ مہر دی رقم 51 ہزار رُوپئے رکھی گئی سی۔ ویاہے جاون والی جوڑی سماجی کارکن ہین۔
نائیش حسن نے ڈاکٹر سعیدہ حمید نوں دلی توں نکاح پڑھوان لئی اچیچا سَدیا سی۔ اِنج دا دعویٰ کیتا جا رہیا اے کہ کسے زنانی نے قاضی بن کے پہلی وار نکاح کروایا اے۔ ایس نکاح نامے وچ کئیاں نویاں گلاں رلت نیں ایہنوں بھارت مسلم وویمن موومنٹ نے تیار کیتا اے۔ ایس وچ مرد نوں تین طلاقاں کہہ کے نکاح توڑن دی اجازت نہیں ہے ۔ زنانی تے بندے دونواں نوں طلاق دا حق ہے۔ ایس ویاہ وچ لاڑھا جنج لے کے نہیں آیا سی تے ووہٹی نوں جی آیاں نوں عام پروہنیاں ہار کیتا گیا۔
میڈیا نال گل بات وچ ووہٹی نائیش نے کیہا " مرد قاضی بندیاں دی پردھانگی سماجی نظام دا انگ ہے جد کہ اسلام وچ برابری تے مساوات تے زور دِتا گیا جے۔ جیکر کوئی زنانی نکاح پڑھاؤندی ہے تاں کئی مثبت تبدیلیاں آسکدیاں نیں۔" اوہناں دا آکھنا سی پئی ایہہ تبدیلی دی لہر ہے تے ایہدا مُڈھ اوہ آپ بنھن رہیاں نیں۔
ایس نکاح دے ویلے موجود مسلم پرسنل لاء بورڈ دی اک زنانی ممبر نسیم عفت دار علی نے صرف زنانی گواہاں تے اعتراض کیتا ہے۔ اوہناں دا آکھنا سی کہ شریعت دے مطابق اک مرد گواہ ہونا چاہیدا اے۔ اوہناں دے کہن تے اخیر تے اک مرد نوں گواہ رکھیا گیا۔
حمایت تے مخالفت مولانا خالد رشید تے کجھ دوجے مسلم علماء نے ایس نکاح دی مخالفت کیتی اے اوہناں دا آکھنا سی کہ نکاح وچ مرد اِی قاضی دی ذمے واری ادا کرسکدا ہے۔ پر سینیئر وکیل ظفریاب جیلانی دا کہنا سی پئی ایہدے وچ کوئی اوپری گل نہیں ہے تے ایہہ غیر اِسلامی وی نہیں ہے۔اوہناں دا کہنا سی کہ مسلماناں دا ویاہ اک اِقرار ہے تے ایس وچ گواہاں دی لوڑ ہندی ہے، زنانی یاں بندہ ہون نال ایہدے وچ کوئی فرق نہیں پیندا۔ اوہناں دَسیا کہ ویاہ دے ویلے خطبہ پڑھنا وی مسلماناں دے ویاہ دا لازمی انگ نہیں ہے تے ایہنوں زنانی یاں مرد کوئی وی پڑھ سکدا اے۔
ادیب شکیل صدیقی نے ایس ویاہ نوں اک جرأت مندانہ قدم آکھدے ہوئے کیہا اے ایس نال کئی رسماں ٹُٹیاں نیں تے ایہدے نال مسلمان مُنڈیاں کُڑیاں نوں ویاہ دے آپ فیصلے کرن حق حاصل ہووے گا۔
نویں جوڑی نوں بھاگ دیاں دعاواں دین لئی اوہناں دے سماجی ورکر موجود سن ایس وچ وویمن پرسنل لاء بورڈ دی چیئرپرسن شائستہ عنبر تے لکھنؤ یونیورسٹی دی گذریل وائس چانسلر روپ ریکھا ورما وی رلت سن۔
خاندان والیاں نوں میڈیا دا اِجڑ پسند نہیں سی آرہیا کیونجے ایس ویاہ وچ بوہتے میڈیا دے بندے موجود سن۔
