ایشین ہیومن رائٹس کمیشن نے پاکستان دے صوبہ بلوچستان دے ضلع جعفر آباد وچ غیرت دے ناں تے تناں کڑیاں دے قتل دی پن چھان نہ ہوون تے چنتا دا وکھالا کیتا ہے۔اطلاعواں موجب قتل دا ایہہ واقعہ پچھلے مہینے بلوچستان دے شہر اوستی محمد دے نیڑے پنڈ بابا کوٹ وچ ہویا جتھے عمرانی قبیلے نال تعلق رکھن والیاں تناں کڑیاں نوں اوہناں دے ساکاں نے گھروں نسن تے گولیاں مار دتیاں۔
جعفر آباد توں ملن والیاں اطلاعواں موجب چوداں جولائی نوں عمرانی قبیلے دے اٹھاراں توں ویہہ سال دی عمر دیاں تن کڑیاں تمبو بابا کوٹ توں نس کے اوستہ محمد آئیاں تے اوتھے اوہناں اک مقامی ہوٹل وچ کمرہ لیا۔اوہناں دے قبیلے دے لوک اوہناں دا پچھا کردیاں ہوئیاں اوستہ محمد اپڑ گئے تے اہناں کڑیاں نوں پھڑ کے واپس لے آئے جتھے اوہناں نوں قتل کرن توں مگروں باباکوٹ دے کمبولہ قبرستان وچ دفنا دتا گیا۔
جعفر آباد دے ضلعی پلس افسر نذیر احمد کرد نے بی بی سی نوں اپنے علاقے توں تناں زنانیاں دے اغوا تے ضلع نصیر آباد وچ اوہناں دے قتل دی تصدیق کردیاں ہوئیاں کہیا ' اہناں زنانیاں نوں غیرت دے ناں تے قتل کیتا گیا سی'۔ اوہناں دسیا بلوچستان ہائیکورٹ نے اک مقامی اخبار وچ خبر چھپن توںمگروں ایہدے تے آپوں کاروائی شروع کیتی ہے۔
انسانی حقاں دی ستھ ایشین ہیومن رائٹس کمیشن نے کہیا ہے اہناں کڑیاں نوں گولیاں مارن توں مگروں جیوندیاں دفن کر دتا گیا ہے۔ پر پلس پربندھیاں موجب اہناں زنانیاں نوں جیوندیاں دفن نہیںکیتا گیا۔
انسانی حقاں دی ستھ ولوں جاری کیتے بیان موجب واقعے وچ رلتی بندیاں دا تعلق عمرانی قبیلے دے اک تگڑے بندے نال ہے تے ایہو کارن ہے جو اک مہینہ لنگھن توں مگروں وی کوئی قنونی کاروائی نہیں کیتی جاسکی ہے۔
ایس حوالے نال بی بی سی نال گل کردیاں ہوئیاں عمرانی قبیلے نال تعلق رکھن والے بلوچستان کابینہ دے رکن صادق عمرانی نے کہیا اوہناں دے قبیلے دے کجھ بندے سیاسی پاڑ توں ایس قتل وچ اوہناں دے خاندان نوں رلاون دی کوشش کر رہے ہین جدوں کہ ایہہ زنانیاں اصل وچ اہناں آپوں قتل کیتیاں ہین۔
صادق عمرانی نے ایس واقعے دی تفصیل دسدیاں ہوئیاں کہیا، اہناں دے قبیلے دیاں تناں زنانیاں نوں سیاہ کاری دی ریت ہیٹھ اوہناں دے قبیلے دے کجھ بندیاں قتل کیتا تے اوہناں نوں اوتھے اک قبرستان وچ دفن کیتا گیا ہے۔'
ایشین ہیومن رائٹس کمیشن نے اپیل کیتی ہے جو نا انصافی دے ایس بھیڑے واقعے تے ملک دے صدر، وزیر اعظم تے ہور اُچ پدھری پربندھیاں نال احتجاج کیتا جاوے تے ایس وچ رلتی وڈے بندیاں دے خلاف کاروائی کرن لئی صوبائی تے مرکزی حکومت تے دبا پایا جاوے۔
