پاکستان دے شہر لہور وچ کجھ ایہو جہیاں زنانیاں بیوٹی پارلراں تے آؤن والیاں زنانیاں دے حسن نوں شنگھاردیاں نیں جیہناں دا اپنا حسن اوہناں دے گھر والیاں نے تیزاب سُٹ کے برباد کر دتا سی۔
' ڈپلیکس سمائل اگین فاؤنڈیشن' دی ہتھ ونڈائی نال ایس طرحاں دیاں کئی زنانیاں بیوٹی پارلراں تے کم کر رہیاں نیں۔ ایہہ ستھ ایہو جہیاں زنانیاں دی امداد کردی ہے جیہناں نوں تیزاب سُٹ کے ساڑ دتا گیا ہووے۔ ایس کم وچ ستھ دا ہتھ پاکستان دی مشہور بیوٹیشن مسرت مصباح ہوریں ونڈا رہیاں نیں۔
'سمائل اگین' اٹلی دی اک این جی او ہے جیہڑی تیزاب سُٹ کے ساڑیاں جاون والیاں زنانیاں دے علاج دا پربندھ کردی ہے۔ ایس ستھ دی لسٹ وچ 240 زنانیاں نیں جیہناں وچوں 83 ایہو جہیاں نیں جیہناں دا دوا دارو ہو رہیا ہے۔ ہیومن رائٹس کمیشن موجب 2007 وچ 32 زنانیاں تیزاب سُٹ کے ساڑیاں گئیاں تے 45 نوں اگ لا کے ساڑیا گیا۔ پر ایہہ آنکڑے پورے نہیں کیوں جو کئی انج دے معاملے ساہمنے آؤن ای نہیں دتے جاندے ہین۔
پچھلے ورھے مصباح نے اٹلی وچ دس زنانیاں نوں بیوٹی کورس کروایا سی۔ اہناں وچوں کئیاں لئی ایہہ کم ایس کر کے اوکھا ہوندا اے کہ اوہناں دے ہتھ اینے سڑ گئے ہوندے نیں جو اوہ ایس جوگے رہندے ای نہیں۔
