گل تے ایہہ حیرانگی دی پر ہے سچ۔ اِٹلی دے اک پادری دا کہنا ایں کہ اوہ ننز لئی دنیا دے پہلے مقابلہ حسن دا پربندھ کررہے ہین۔
پادری اینٹونیو رنگی دا کہنا اے کہ ایس مقابلے توں ننز بارے بوہتی عمر دِیاں تے سخت ہون دا پکھ بھنیا جاوے گا۔ اوہناں کہنا ہے کہ "مِس سسٹر اِٹلی" مقابلہ اک آن لائن مقابلہ ہووے گا تے ستمبر وچ اوہناں دے بلاگ تے ایہدا مُڈھ بنھیا جاوے گا۔
اوہناں نے اِٹلی دے اک اخبار نوں دَسیا، " سوہپن تے رب ولوں لبھیا تحفہ ہے تے نن عام زنانیاں توں اُچیچ ہوندیاں ہین۔" اوہناں نے ننز نوں آکھیا کہ اوہ اپنی فوٹو اوہناں نوں گھل دین تے ایس دے مگروں انٹرنیٹ ورتن والے لوک جِتن والی دا فیصلہ کرن گے۔
فادر رنگی نے زور پاؤندیاں آکھیا کہ ننز نوں تاری (سوئمنگ) دے لیڑیاں وچ پریڈ کرن دا نہیں کیہا جاوے گا۔ اوہناں دا آکھنا سی کہ ایہہ نناں تے ہے کہ اوہ روایتی کپڑیاں وچ اپنیاں تصویراں گھلنیاں چاہوندیاں ہین یاں فیر اپنا سِر کھُلا رکھنا چاہوندیاں ہین۔
اِٹلی دے دکھنی شہر نیپلز وچ رہن والے فادر رنگی نے کیہا، " مقابلہ ایہہ وِکھاون دی وی کوشش اے کہ حُسن صرف اوہ نہیں اے جیہڑا ٹیلیویژن تے وِکھدا اے، سگوں پاکیزگی دا وی اپنا اِی جادو ہے۔"
اِٹلی وچ دنیا بھر توں آون والیاں نناں دی مشہوری کردیاں ہوئے اوہ کہندے ہین " کیہہ تُسیں سوچدے او کہ ننز بُڈھیاں تے اُداس روحاں ہوندیاں ہین؟ ہُن معاملہ اِنج دا رہیا نہیں۔"
اوہناں دا دعوٰی ہے اجیہے حُسن دے مقابلے کروان دا سُجھاء آپ نناں وَلوں آیا سی۔
