عورتاں نوں جیوندیاں دفن کرنا بلوچ ریت ہے:اسرار زہری

سینیٹر اسرار اللہ زہری نے بلوچستان وچ پنجاں زنانیاں نوں جیوندیاں دفن کرن دے واقعے نوں قبائلی ریتاں دی پاسداری کہیا ہے۔ بلوچستان نال تعلق رکھن والے سینیٹر اسرار اللہ زہری نے کہیا ہے جو بلوچ قبیلے نے قبائلی ریتاں نوں ویکھدیاں یوئیاں پنجاں زنانیاں نوں نپیا ہے ایس لئی ایس معاملے نوں نہ چکیا جاوے''۔

جمعے نوں سینٹ دے اجلاس وچ اوہناں کہیا بلوچستان وچ وسن والے قبیلیاں دیاں اپنیاں اپنیاں ریتاں ہوندیاں ہین جنہاں دی اوہ پاسداری کردے ہین۔

حزب اختلاف نال تعلق رکھن والی سینیٹر یاسمین شاہ نے کہیا پنجاں زنانیاں نوں جیوندیاں دفن کرن دے واقعے دا کوئی نوٹس نہیں لیاگیا۔ اوہناں نے کئی اخباراں وچ چھپن والیاں خبراں دا حوالہ دیندیاں ہوئیاں کہیا ایس واقعہ وچ پاکستان پیپلز پارٹی دے اک وزیر دا بھرا وی رلتی ہے ایس لئی قنون بناون والے ادارے اوہناں دے خلاف کوئی کاروائی نہیں کر رہے۔

اوہناں کہیا اہناں زنانیاں دا قصور بس اینا ہے جو اوہ اپنی مرضی نال ویاہ کرنا چاہندیاں سن جنہاں دا اسلام نے اوہناں نوں حق دتا ہے۔قائم مقام چیئر مین سینٹ محمد جمالی نے کہیا ' ایس تے ایوان وچ گل کرنا بوہت سوکھا ہے تسیں ایس علاقے وچ جاؤ تے اوتھے دے حالات ویکھ کے پھیر ایوان وچ گل کرو۔

جان محمد جمالی نے کہیا جیس علاقے وچ ایہہ واقعہ ہویا ہے اوہ اوہناں دے علاقے دے نیڑے ہے ایس لئی جدوں تیکر اوہدی رپورٹ نہ آجاوے اُس ویلے تیکر اوہ وی ایہدے تے گل نہیں کرسکدے۔

سینٹ وچ قائد حزب اختلاف کامل علی آغا نے کہیا ملک وچ آئین تے قنون موجود ہے تے اوہناں دی موجودگی وچ جے انج دے واقعے ہوون گے تے پھیر دنیا وچ ملک دی ساکھ خراب ہووے گی۔ اوہناں کہیا ایس معاملے نوں سینیٹ دی کمیٹی دے سپرد کر دتا جاوے جیہڑی ایہدی پن چھان کر کے رپورٹ ایوان وچ پیش کرے۔

سینیٹ وچ قائد ایوان رضا ربانی نے کہیا کیوں جو ایہہ اک صوبائی معاملہ ہے ایس لئی حکومت نے صوبائی حکومت نوں کہیا ہے جو اوہ ایس واقعے دی رپورٹ مکمل کر کے وفاقی حکومت نوں گھلن۔ رضا ربانی نے کہیا جے ایس واقعے وچ پاکستان پیپلز پارٹی نال تعلق رکھن والے وزیر دا کوئی ساک وی رلتی ہویا تے اوہدے خلاف وی قنونی کاروائی کیتی جاوے گی۔ اوہناں کہیااوہ پیر نوں ایوان وچ بیان دیون گے تے جے ایوان دے رکناں ایہدے تے اک نہ ہوئے تے اہنوں ایوان دی انسانی حقاں بارے کمیٹی دے سپرد کر دتا جاوے۔