5 زنانیاں جیوندیاں دبن دے معاملے نوں حکومت نویں پاسے لے تُری

بلوچستان وچ پیپلز پارٹی دی حکومت دے پردھان قبیلے رئیسائی نے سینٹ وچ 5 زنانیاں نوں جیوندیاں دفن کرن دی کہانی اک نویں رخ نال اج پیش کرنی ہے۔ صوبائی کابینہ وچ پی پی دے وزیر دے نکے بھرا نے کہیا ایہہ گل مجرماں نوں بچاون لئی کیتی جاوے گی۔

پنجاں بلوچی زنانیاں نال بھیڑے ورتارے دی رپورٹ اج سینیٹ وچ پیش ہوون توں مگروں قائم مقام چیئر مین محمد جمالی ایس حوالے نال رولنگ جاری کرن گے ۔ بلوچستان دے پچھلے وزیر اعلیٰ جان محمد جمالی نوں بڑی اوکھی صورتحال دا ساہمنا ہے جدوں اوہ قائم مقام چیئر مین سینٹ دی کرسی تے بیہہ کے اپنے صوبے دیاں زنیاں نال ظالمانہ سلوک تے فیصلہ جاری رکھن گے تے میڈیا تے سول سوسائٹی اوہناں دا بڑی گوہ نال مشاہدہ کرن گے۔

سوال ایہہ ہے جو کیہہ چیئر مین سینٹ اپنے صوبے دیاں زنانیاں دے حقاں لئی کھلون گے یاں اوہ عزت دے ناں تے زنانیاں دے قتل دیاں صدیاں پرانی ریت دی حمیت کرن گے۔ بلوچستان دے قبائلی سرداراں وچ ایس معاملے تے ایکا نظر آرہیا ہے تے پشتون تے بلوچ قبلیاں نے ایس ظالمانہ معاملے تے اک لفظ وی نہیں کہیا جدوں کہ اوہ تے زنانیاں نوں قتل کرن دے قبائلی فیصلے دی عزت کرن نوں ترجیح دے رہے ہین۔ ایس ڈرامے دا اصلی مجرم اک سیریل قاتل ہے جنہے عزت دے ناں تے اپنے عمرانی قبیلے دی اک زنانی نوں قتل کر دتا تے اوہنوں پھڑیا نہیں گیا کیوں جو اوہدا بھرا بلوچستان دی صوبائی کابینہ وچ پی پی دا وزیر ہے۔

وزارت داخلہ نے ایس سنگین معاملے دی پن چھان لئی حالیں پلس افسر طارق کھوسہ دی تقرری دا حکم جاری کردتا ہے۔ مشیرداخلہ رحمان ملک نے دسیا جو ایس معاملے دی پن چھان لئی طارق کھوسہ نوں لایا گیا ہے پر وسیلیاں دا کہنا ہے حالی ایس حوالے نال کوئی تحریری حکم جاری نہیں کیتا گیا۔ وسیلیاں دا کہنا ہے جو ایس معاملے وچ طارق کھوسہ نوں انکوائری آفیسر لاون دی خبر بلوچستان سرداراں لئی کجھ چنگی نہیں سی کیوں جو اوہ دبا قبول کیتے بغیر گڑھے مردے پٹن دے حوالے نال بڑی شہرت رکھدے ہین۔

سرکاری وسیلیاں دا کہنا ہے جو سینٹ نوں ہن دسیا جاوے گا جو اہناں زنانیاں نوں پہلوں گولی نال قتل کیتا گیا مارن توں مگروں اوہناں نوں زمین وچ دفن کیتا گیا۔ وسیلیاں دا کہنا ہے جو ایس انکوائری رپورٹ دا مقصد جیوندیاں زنانیاں نوں دفن کرن دے معاملے توں توجہ ہٹاونا ہے کیوں جو ایہہ بوہتا غیر انسانی جرم ہے۔ہن مستقبل وچ ہر بیان وچ حکومت ایہہ دعویٰ کرے گی جو اہناں زنانیاں نوں قتل توں مگروں دفن کیتا گیا ہے۔

ہن وفاقی حکومت نوں بلوچستان ولوں ایس معاملے دی نویں رپورٹ موصول ہو گئی جدوں کہ آئی جی آصف نواز دی پہلی رپورٹ سیکرٹری داخلہ کمال شاہ نے رد کر دتی سی۔آئی جی آصف نواز دی پہلی رپورٹ انسپکٹر جنرل پلس دے دفتر دی تذلیل سی جنہاں نے اخباراں دیاں خبراں نوں رپورٹ وچ بدل دتا جیہدے تے سیکرٹری داخلہ غصے وچ آگئے۔ خواتین محاذعمل نے پریس نوٹ وچ کہیا اوہ اہناں تناں واقعیاں تے ہرکھے ہوئے تے خوفزدہ ہین پہلوں اہناں پنجاں زنانیاں نوں مارا مار دا نشانہ بنا کے جیوندیاں دفن کر دتا گیا۔ کیوں کہ اہناں وچوں تن زنانیاں قبائلی حداں نوں توڑ کے اپنی مرضی دا ویاہ کرن لئی عدالت گئیاں۔ حمیدہ، رقیہ، تے رحیمہ اہناں زنانیاں وچوں ہین جنہاں نوں غیرت دے ناں تے گوٹھ قبولہ وچ قتل کر دتا گیا۔

اوہناں کہیا اسیں بوہت غصے وچ آں پچھلے چھ ہفتیاں توں مقامی پلس تے قنون نافذ کرن والے ادارے پیپلز پارٹی دے سیاسی دبا تے ایکشن لین تے ایس جرم دے وقوع توں انکار کر رہے ہین عزت دے ناں تے قتل ورگا ایہہ واقعہ مقامی ضلعی حکومت دی رائے تے حمیت نال ہویا۔ مقامی حکومت دے پردھان ضلعی ناظم سردار فتح عمران دی سرکاری گڈی اہناں پنجاں زنانیاںنوں اک تھاں توں دوجی تے کھڑن لئی ورتی گئی جیہڑے پی پی دے وزیر ہاؤسنگ دے بھرا ہین۔سینیٹ وچ بی این پی نال تعلق رکھن والے سینیٹر میر اسرار اللہ زہری ولوں ایس واقعہ دا دفاع بوہت نہیں جدوں زنانی تے مرد سینیٹراں نے ایس معاملے تے احتجاج کیتا تے سینیٹ دے قائم مقام چیئر مین جیہڑے آپوں بلوچی ہین ایس واقعے دی مذمت کردیاں ہوئیاں آپوں حکومتی انکوائری رپورٹ دی لوڑ دے پچھے لکا دتا۔ خواتین محاذ عمل ایس معاملے تے حکومت انکوائری رپورٹ (جدوں کہ پلس اُس خاندان تے میڈیا نوں دبا رہی ہے) نوں اُڈیک رہی ہے۔