زنانیاں نوں جیوندیاں دبن دے خلاف سینٹ تے سندھ اسمبلی وچ مذمتی قراداداں منظور

پیر دی شام سینٹ دے اجلاس وچ بلوچستان وچ پنجاں زنانیاں نوں جیوندیاں دبن دے واقعے دے خلاف اک مذمتی قراداد منظور کیتی گئی جیہدے وچ ایس واقعے وچ رلتی بندیاں دے خلاف سخت قنونی کاروائی کرن دی منگ وی کیتی گئی۔ ایس توں پہلوں وفاقی وزارت داخلہ دے پردھان رحمن ملک نے ایوان نوں دسیا جو اوہناں نے ایس واقعے دی پن چھان دا حکم دیندیاں ہوئیاں ایہدی رپورٹ منگوائی ہے تے ہن تن بندیاں نوں پھڑ کے تفتیش شروع کیتی جاچکی ہے۔

اجلاس وچ سینٹ دے رکناں دی اک وڈی گنتی نے اپنیاں تقریراں وچ ایس واقعے دی مذمت کردیاں ہوئیاں کہیا ایہدے نال ملک دی بدنامی ہوئی ہے کیوں جو کسے جرگے نوں وی کسے دی زندگی لین دا حق نہیں ہے۔

دوجے پاسے پارلیمنٹ دی عمارت دے ساہمنے ایس واقعے دے خلاف سول سوسائٹی دیاں ستھاں تے زندگی دے دوجے شعبیاں نال تعلق رکھن والے لوکاں نے اک احتجاجی وکھالا کیتا جیہدے وچ رلتی بندیاں دی چھیتی گرفتاری تے کاروائی دی منگ کیتی گئی۔ وکھالیاں نے وزیر اعظم یوسف رضا گیلانی تے پیپلز پارٹی دے شریک چیئر مین آصف علی زرداری دے زنانیاں دے قتل دے ایس واقعے تے مذمتی بیان نہ دیون تے وی تنقید کیتی۔

وکھالیاں وچ رلتی انسانی حقاں دی اک ستھ دی رکن طاہرہ عبداللہ نے کہیا وزیر اعظم تے آصف علی زرداری صدارتی چوناں دے کارن مصلحتاََ ایس واقعے دی مذمت کرن توں ولا رہے ہین کیوں جو اوہ بلوچستان اسمبلی وچ صدارتی امیدوار زرداری دی حمیت لئی حمیت گنوانا نہیں چاہندے۔

سندھ اسمبلی وچ وی پیر نوں بلوچستان وچ پنجاں زنانیاں نوں جیوندیاں دبن دے خلاف مذمتی قراداد متفقہ طور تے منظور کر لئی گئی ہے جیہدے وچ کہیا گیا ہے جو ایہہ اسمبلی بلوچستان وچ پنجاں زنانیاں نوں جیوندیاں دفن کرن دے ظلمی واقعے دی سختی نال مذمت کردی ہے تے اہنوں انسانیت دے خلاف اک بھیڑا کم من دی ہے۔ قراداد وچ صوبائی حکومت نوں کہیا گیا جو اوہ وفاقی حکومت نال رابطہ کرے تے اہنوں واقعہ وچ رلتی بندیاں نوں بے نقاب کر کے انصاف دے کٹہرے تیکر لیائے۔ چیتے رہوے جو ایہہ قراداد صوبائی وزیر اطلاعات شازیہ مری نے پیش کیتی۔

چیتے رہوے جو قتل دا ایہہ واقعہ کجھ ہفتے پہلوں بلوچستان دے شہر اوستہ محمد دے نیڑے پنڈ بابا کوٹ وچ پیش آیا جتھے اپنی مرضی نال ویاہ کرن دی کوشش تے عمرانی قبیلے دیاں پنجاں زنانیاں نوں قبیلے دے وڈے بندیاں نے سزا دیندیاں ہوئیاں جیوندیاں دب دتا سی جدوں کہ ایس واقعے دی ذمے واری بلوچستان اسمبلی وچ رلتی پیپلز پارٹی دے اک وزیر دے بھرا تے لائی گئی ہے۔

دوجے پاسے ایہہ واقعہ ساہمنے آیا ہے تے انسانی حقاں دیاں ستھاں روس وکھالا کررہیاں ہین تے منگ کررہیاں ہین جو ایس بھیڑے فعل دا دفاع کرن والے رکناں دی رکنیت منسوخ کیتی جاوے۔