پنجاں زنانیاں نوں جیوندیاں دبن دے واقعے دے خلاف سارے ملک وچ وکھالے

بلوچستان وچ مقامی رسماں رواجاں ہیٹھ خاندانی غیرت دے ناں تے پنجاں زنانیاں نوں جیوندیاں دبن دے واقعے تے پاکستان وچ کئی حلقیاں ولوں بوہت غصے دا وکھالا جاری ہے۔

وکھالیاں وچ وفاقی تے بلوچستان دی صوبائی حکومتاں توں ایہہ منگ کیتی جارہی ہے جو اوہ ایس جرم وچ رلتی بندیاں دے خلاف سخت کاروائی کرن سگوں بلوچستان نال تعلق رکھن والے اہناں سینٹ دے رکناں دی رکنیت وی معطل کر دتی جاوے جنہاں نے ایوان وچ ایس معاملے تے ہوون والی بحث وچ ایس ظالمانہ کاروائی نوں قبائلی رسم رواج آکھ کے اوہناں دا دفاع کیتا ہے۔

پیر نوں اسلام آباد وچ سول سوسائٹی دیاں ستھاں دی قیادت وچ پارلیمنٹ دی عمارت دے ساہمنے اک احتجاجی وکھالا کیتا گیا۔ وکھالے وچ شریک انسانی حقاں دی اک کارکن ثمر من اللہ دا کہنا سی جو قنون نافذ کرن والیاں نوں ایس شرمناک حرکت وچ رلتی بندیاں نوں ہتھ پاونا چاہی دا ہے تے انج نہ ہووے جو انج دے بھیڑے جرم کرن والیاں نوں ہلا شیری ملے۔ اوہناں منگ کیتی ہے جو جیوندیاں دب دتیاں جاون والیاں اہناں کڑیاں نوں ' ونی ' وچ دیون والے جرگے دے پردھان نوں وی کٹہرے وچ لیاندا جاوے۔

سینٹ دے اک رکن جمال لغاری نے ایس موقعے تے وکھالیاں دے نال یک جہتی کردیاں ہوئیاں کہیا ایس معاملے دی پن چھان کرن والے بندیاں دا تعلق وی اوسے قبیلے نال ہے جنہے اہناں زنانیاں نوں جیوندیاں دبن دا حکم دتا ، ایس لئی اوہناںنوں انصاف دی بوہت گھٹ آس ہے۔

جمال لغاری نے کہیا ' میں آپوں اک بلوچ قوم دے سردار دا پتر ہاں۔ ساڈی بلوچ قوم وچ انج دے جیوندیاں دبن دے واقعے بالکل نہیں ہوندے۔ اسرار اللہ زہری نے جیہڑے گل کیتی اوہ سراسر غلط ہے تے اوہ کسے صورت وچ اوہدی حمیت نہیں کرسکدے'۔

مبصراں لئی ایہہ گل وی حیرانی دا کارن بنیا ہویا ہے جو وزیر اعظم یوسف رضا گیلانی یاں حکمراں جماعت پیپلز پارٹی دے پردھان آصف علی زرداری ولوں حالی تیکر ایس واقعے تے کوئی مذمتی بیان ساہمنے نہیںآیا۔ ایہدے توں وکھ پیپلز پارٹی دیاں رکن زنانیاں نوں ایہدے تے کجھ کہن لئی کہیا گیا تے اوہ ولا گئیاں کہ اوہ ایس گل دیاں تفصیلاں توں جانکاری نہیں رکھدیاں ہین۔

تنقید کرن والیاں دا کہنا ہے جو صدارتی چوناں توں کجھ دیہاڑ پہلوں انج دے پاڑ والے معاملے تے کوئی سخت بیان دے کے ظاہر وچ حکمراں جماعت اپنے صدارتی امیدوار آصف علی زرداری لئی بلوچستان اسمبلی دی حمیت کھونا نہیں چاہندی۔

انسانی حقاں لئی کم کرن والی طاہرہ عبداللہ موجب : 'کل وزیر اعظم کوئٹہ گئے سن اوہناں نوں چاہی دا سی جو سخت لفظاں وچ مذمت کردے تے سخت لفظاں وچ حکم دیندے اوتھوں دی پلس تے بلوچستان دی صوبائی حکومت نوں۔ کجھ وی نہیں۔ چپ۔ اوہ تے صدر دی کنوینسنگ لئی اوتھے گئے سن۔ شرم دا مقام ہے۔ نہ زرداری ولوں نہ گیلانی ولوں کجھ آیا۔ پیپلز پارٹی والے تے رہندے سارے بلوچ قبیلیاں والے سینٹ وچ کھلو کے دفاع کر رہے ہین اُس بندے دا ؟''

پاکستان وچ انسانی حقاں دے کم کرن والیاں ستھاں دا کہنا ہے جو ملک دے دوجے صوبیاں، اُچیچا سندھ، جنوبی پنجاب، تے سرحد دے دور دور دے علاقیاں وچ وی ہر سال درجناں زنانیاں نوں خاندانی غیرت دے ناں تے قتل کر دتا جاندا ہے۔