انسانی حقاں دے کارکن تے گذریل انسانی حقاں دے وزیر ڈاکٹر انصار برنی تے انسانی حقوق کمیشن (بلوچستان چیپٹر) دے گذریل پردھان ایڈوکیٹ ظہور شاہوانی نے بلوچستان وچ پنجاں زنانیاں دے جیوندیاں دبن دے واقعے دی بھرویں مذمت کیتی ہے۔
دوہواں نے ایس واقعے نوں بربریت تے ظلم کہیا تے ذمے واراں نوں کیفرکردار تیکر اپڑاون دی منگ کیتی۔
ظہور شاہوانی نے دسیا جو بلوچستان ہائیکورٹ نے واقعے دا آپوں نوٹس لے لیا ہے تے انسانی حقاں دے کمشن نوں اک دھر بنا کے عدالت سدیا ہے۔ پر ایس سوال تے جو وسیب وچ موجود ریتاں،سیاسی ہستیاں دا دبا تے تھانہ کلچر دی موجودگی وچ انصاف دی آس کیتی جاسکدی ہے،ظہور شاہوانی دا کہنا سی جو اوہناں نوں ڈر ہے ایف آئی آر کلچر تے سیاسی مداخلت قاتلاں نوں بچا لوے گی۔
ڈاکٹر انصار برنی نے سینیٹر اسرااللہ زہری ولوں ایس واقعے دی بوہت مذمت کیتی تے اوہناں دی رکنیت معطل کرن دی منگ کیتی۔ بلوچستان وچ پنجاں زنانیاں نوں جیوندیاں نپن دا واقعہ اودوں پیش آیا ہے جدوں انسانی حقاں دی ملکی تے غیر ملکی ستھاں تے بین الاقوامی برادری پاکستان تے پہلوں ہی تنقید کر رہیاں ہین۔اک وڈی گنتی وچ گواچے بندیاں دا معاملہ تے میڈیا دے نمائندیاں دا اغوا تے قتل وکیل تے سول سوسائٹی تے ریاستی مارا مار انج دے واقعے تصویراں دے نال عالمی میڈیا وچ اُگڑے ہین۔
انج دے حالاں وچ بلوچستان وچ زنانیاں نوں بس ایس لئی جیوندیاں دفن کر دینا جو اوہ اپنے پسند دا ویاہ کرنا چاہندیاں سن، جبر بربریت دی شرمناک مثال ہے۔ ایس تے ملک دے ایوان وچ اک بلوچ سردار ایس واقعے دی حمیت کردیاں ہوئیاں کہندے ہین جو ایہہ بلوچ قبائلی ریتاں دا حصہ ہے، ایس معاملے نوں نہ بوہتا چکیا جاوے۔
ایس موقعے تے سوال چکیا جاسکدا ہے جو ایہہ ریت تے تاریخ دے صفحیاں موجب مذہب اسلام دے ظہور توں پہلوں وی موجود سن تے مذہب انج دیاں ریتاں دے مکا دا درس دیندا ہے تے اج دا سردار بھاویں اوہ بلوچستان توں ہووے یا سندھ ، پنجاب سرحد توں کیہدا پیروکار ہے، مذہب دا یاں ریتاں دا یاں موقع محل موجب دوہواں دا؟
جدوں مذہب دائرہ تنگ کرے تے ریتاں وچ پناہ لبھ لئی جاوے تے جدوں ریتاں ساتھ چھڈن لگ پین تے مذہب دا آسرا بھالیا جاوے؟ کیہہ ریتاں بس زنانیاں تے ہی لگدیاں ہین؟ کیہہ مرد سگوں سردار ہمیش پاک صاف ہین؟ کیہہ اوہ اپنے گریبان وچ جھاتی مارن توں مگروں وی پتھر مارن دا حق رکھدے ہین؟
ایس واقعے تے ایس تے بلوچستان دے اک نمائندہ سینیٹر دے ایہدے حق وچ آواز چکن نال گنجائش پیدا ہو سکدی ہے جو صوبے وچ جاری فوجی آپریشن دے خلاف سارے ملک توںاٹھن والیاں آوازاں مٹھیاں پے جاون۔
دوجے پاسے ویکھنا ایہہ ہے جو زمین وچ چیکاں انصاف دے ایواناں وچ کدوں تے کیویں سن دیاں ہین۔ حکومت جیہدی عملداری تے مقبولیت تے عدلیہ جیہدی آزادی تے غیر جانبداری تے پہلوں سوال چکے جارہے ہین، دوہواں لئی اک وڈا امتحان ہے۔ ویکھنے ہاںجو بنت آدم نوں انصاف زمین تے ملدا ہے یاں اک وار پھیر نظراں اسمان تے ہی لاونیا ہوون گئیاں۔
