بلوچستان دے شہر نصیر آباد وچ سیاہ کاری دے الزام وچ جیوندیاں دب دتیاں جاون والیاں دوہواں کڑیاں دیاں لوتھاں قبر پٹن توں مگروں کڈھ لئیاں گئیاں ہین۔ پلس موجب اہناں دے جسم تے گولیاں دے نشان ہین تے اوہناں نوں کفن دے بغیر دفن کیتا گیا ۔
ڈپٹی انسپکٹر جنرل پولیس نصیر آباد شبیر احمد شیخ نے دسیا کہ قبراں کڑیاں دے آبائی پنڈ بابا کوٹ توں دس کلومیٹر دور سن۔ اوہناں نے کہیا ڈاکٹراں، پلس، تے مجسٹریٹ دی موجودگی وچ قبرکشائی کیتی گئی جتھوں دوہواں کڑیاں دیاں لوتھاں ملیاں ہین تے اوہناں تے گولیاں دے نشان سن۔
شبیر احمد شیخ نے دسیا کہ کڑیاں نوں بغیر کفن دے سادہ کپڑیاں وچ دفن کیتا گیا سی جیس توں ظاہر ہوندا ہے جو اہناں کڑیاں نوںسیاہ کاری دے الزام وچ قتل کیتا گیا ہے کیوں کہ انج دے واقعیاں وچ لوتھ نوں کفن وچ دفن نہیں کیتا جاندا۔ مقامی صحافی ہاشم بلوچ نے دسیا ہے جو ایس بارے پن چھان کیتی جارہی ہے۔
پہلیاں اطلاعواں وچ ایہہ گل ساہمنے آئی سی جو پنجاں زنانیاں نوں جیوندیاں ساڑ کے دفن کیتا گیا سی جیہدے مگروں پلس نے دسیا جو ایہہ پنج زنانیاں نہیں سن سگوں تن سن جنہاں نوں قتل کیتا گیا ہے۔ سندھ اسمبلی وچ کل یعنی سوموار نوں ایس واقعے دی مذمت کیتی گئی سی پر بلوچستان اسمبلی وچ ایس حوالے نال کوئی گل نہیں کیتی گئی۔
مخلوط حکومت وچ شامل بلوچستان نیشنل پارٹی دے آگو سینیٹر اسرار اللہ زہری نے قتل دے ایس واقعے نوں بلوچ ریت آکھیا ہے۔
