زنانیاں نوں جیوندیاں دبن دے کیس دی پوسٹ مارٹم رپورٹ

بلوچستان دے شہر نصیر آباد دے پنڈ وچ قتل کیتیاں گئیاں دوہواں زنانیاں دیاں لوتھاں دے پوسٹ مارٹم موجب اہناں زنانیاں نوں مارا مار کر کے ماریا گیا ہے تے ڈاکٹر موجب اوہناں دے جسم تے گولیاں دے کوئی نشان نہیں سن۔ چیتے رہوے جو پلس پربندھی ایہہ کہندے آئے ہین جو لوتھاں تے گولیاں دے نشان سن۔

پلس سرجن لیڈی ڈاکٹر شمیم گل مشوانی نے دسیا جو دوہواں کڑیاں دیاں عمراں ویہہ توں پنجھی دے وچکار سن تے اوہناں دے سر تے سوٹے مار کے مارا مار دا نشانہ بنایا گیا سی۔ دوہواں دیاں کھوپڑیاں تے پسلیاں ٹٹیاں ہوئیاں ہین جدوں کہ اوہناں دا خون بالکل تازہ ہے۔

اوہناں کہیا دوہواں لوتھاں تے گولیاں دے کوئی نشان نہیں ہین تے ناں ہی انج دے ثبوت ملے ہین جو دوہواں نوں جیوندیاں دفن کیتا گیا ہے جیس ٹوئے وچ اوہناں نوں سٹیا گیا سی اوہ بوہتا ڈوہنگا نہیں سی ہوسکدا ہے جو اوہناں نوں بے سرتی وچ دب دتا گیا ہووے۔ اوہناں دسیا اوہناں دے جسم تے جانوراں دے نوچن دے نشان پائے گئے ہین۔

مڈھلیاں اطلاعواں موجب پنجاں زنانیاں نوں سیاہ کاری دے الزام وچ جیوندیاں دب دتا گیا سی پر پھیر انج دیاں اطلاعواں آئیاں جو ایہہ چار زنانیاں سن۔

اوستہ محمد توں انسانی حقاں دی ستھ دے اک آگو عبداللہ مگسی نے دسیا جو ایہہ پنج زنانیاں ہی سن جنہاں وچوں چواں نوں ماریا گیا دوہواں دیاں لوتھاں نوں جانور لے گئے ہوون گے۔ اوہناں کہیا ایہہ زنانیاں ویاہیاں وریاں سن تے اوہناںنوں اک ٹویا کڈھ کے فائرنگ کر کے ماریا گیا تے پھیر اوہناں نوں ٹوئے وچ سٹیا گیا ہے۔

نصیر آباد دے پلس پربندھیاں نے دسیا سی جو لوتھاں تے گولیاں دے نشان ہین ایس بارے لیڈی ڈاکٹر شمیم گل مشوانی نے کہیا جو لوتھاں نوں ویکھن توں اوہناں نوں وی انج لگیا پر جسم وچ کِتے وی کوئی گولی نہیں سی تے ناں ہی کوئی انج دا نشان ملیا ہے کہ گولی جسم وچوں باہر نکل گئی ہووے۔

نصیر آباد دے ڈپٹی انسپکٹر جنرل پلس غلام شبیر شیخ نے پچھلے دیہاڑ ڈیرہ مراد جمالی وچ اک اخباری کانفرنس وچ دسیا سی جو دوہواں کڑیاں دیاں لوتھاں بابا گوٹھ پنڈ توں دس کلومیٹر دور ویرانے توں ملیاں ہین تے دوہواں نوں اک ہی ٹوئے وچ کفن توں بغیر عام کپڑیاں وچ دب دتا گیا سی۔

اوہناں کہیا اک لوتھ نوں کتیاں نے ٹوئے توں کڈھ لیا سی پر پھیر اوتھے کجھ شکاری اپڑے تے اوہناں نے لوتھ نوں ٹوئے وچ سٹ کے اُتے مٹی پادتی سی۔ غلام شبیر شیخ موجب جیوندیاں دبن والیاں لوتھاں دیاں ہڈیاں ٹٹیاں نہیں ہوندیاں تے اوہناں دی موت ساہ گھٹن نال ہوندی ہے۔ اوہناں نے کہیا جیویں لوتھاں نوں دفن کیتا گیا سی ایہدے توں ظاہر ہوندا ہے زنانیاں نوں سیاہ کاری دے الزام وچ قتل کیتا گیا ہے۔

پلس تے ڈاکٹراں دی ٹیم دے نال جاون والے صحافی نوں جدوں پچھیا گیا جو اہناں زنانیاں نوں کتھے دبیا گیا سی تے دسیا جو پلس تے ڈاکٹراں دی ٹیم ویرانیاں توں لنگھدیاں ہوئیاں جدوں موقعے تے اپڑیاں تے اوتھے پہلے توں پلس اہلکار موجود سن تے اوہناں نے ستاں اٹھاں تھاواں تے ٹوئے کڈھے ہوئے سی۔ ایس تھاں تے کیوں جو سجری مٹی پئی ہوئی سی تے ٹویا کڈھن تے دوہواں زنانیاں دیاں لوتھاں نکلیاں ہین۔

اوہناں کہیا لوتھاں مسخ سن تے ڈاکٹراں موجب اوہناں دی پچھان وی نہیں ہورہی سی۔