بلوچستان: جیوندیاں دبیاں جاون والیاں زنانیاں نوں سزا دیون دا فیصلہ جرگے نے کیتا

کوئٹہ وچ پلس تفتیش وچ ایہہ ہرکھ والی گل ساہمنے آئی ہے جو بلوچستان وچ جیوندیاں نپیاں جاون والیاں بد نصیب زنانیاں تے پہلوں تشدد کیتا گیا سی تے اک رات پہلوں عمرانی قبیلے دا جرگہ وی ہویا سی۔ وسیلیاں نے دسیا جو زنانیاںنوں مارا مار دا نشانہ بنا کے پھیر دفن کرن دا فیصلہ جرگے وچ رلتی ان ڈٹھے رکناں وچکار بوہت بحث توں مگروں کیتا گیا جے ایہہ معمہ حل ہو گیا تے چھیتی ہی علاقے دے انج دے طاقتور بندیاں دے ناں ساہمنے آسکدے ہین جنہاں نے جرگہ کیتا تے اہناں زنانیاں نوں سزا دیون دا فیصلہ کیتا۔

پلس اہناں طاقتور بندیاں تے ہتھ پاون دا منصوبہ بنا رہی ہے جنہاں نے مقامی پلس نوں ایہہ جرم کرن والیاں دے خلاف زبردستی کوئی ایکشن لین توں روکیا سی جیویں پن چھان اگے ودھ رہیاں ہین پلس تفتیش کار ایس گل دے قائل ہوندے جارہے ہین جو اہناں زنانیاں نوں ڈنڈیاں نال ماریا گیا پھیر اوہناں تے فائرنگ کیتی تے پھیر دفنایاگیا۔

ایس گل توں کہانی دے ایس پہلے نظرئیے دی تصدیق ہوندی ہے جو ایہہ زنانیاں اصل وچ پھٹڑ سن تے ایہدے مگروں اوہناں نوں جیوندیاں دبیا گیا۔ اُچ پدھری وسیلیاں نے دعوی کیتا جو کوئٹہ وچ طارق کھوسہ دی سرپرستی وچ کم کرن والی خصوصی ٹیم کوئٹہ وچ تفتیش وچ اک ملزم نے اخیر تفتیش کاراں نال تعاون شروع کردتا ہے تے بڑی اہم گل بات دس رہیا ہے۔ ایہدے نال پلس نوں اپنا نظریہ بناون وچ مدد ملی ہے جو خورے سارا واقعہ انج پیش آیا کیویں اہناں زنانیاں نوں گن پوائنٹ تے بوہت سارے ویکھن والیاں دے ساہمنے اغوا کیتا گیا تے کیویں اوہناں نال غیر انسانی سلوک کیتا گیا۔

ایس توں وکھ پلس نے اُس ٹیکسی ڈرائیور نوں وی لبھنا شروع کر دتا ہے جیہڑا اہناں زنانیاں نوں '' استا محمد '' لے کے گیا جتھے اہناں کڑیاں نے قنون دی عدالت وچ ویاہ کرنا سی۔ ڈرائیور دی برآمدگی نال پلس نوں ملزماں نوں لبھن وچ مدد ملے گی کیوں جو اوہ ایس کہانی دے نامکمل حصیاں نوں پورا کرن وچ مدد کرسکے گا جنہے ساری قوم نوں صدمے وچ پایا ہویا۔

کئی وچلے وسیلیاں موجب اکٹھی کیتی گئی پن چھان موجب کوئٹہ وچ پلس ٹیم ایس گل دی قائل ہو رہی ہے جو اہناں زنانیاں نوں دفنائے جاون توں پہلوں جرگہ ہویا سی۔ ایس شک دی وڈی وجہ ایہہ ہے جو اہناں زنانیاں نوں اوتھے موقعے تے قتل نہیں کیتا گیا جتھوں عمرانی قبیلے دے مسلح بندیاں نے اوہناں نوں چکیا سی۔