5 زنانیاں نوں جیوندیاں دبن والے 4 ملزماں دے خلاف ات واد دا مقدمہ

بلوچستان پلس نے ایس نویں گواہی دے ساہمنے آون توں مگروں کہ پنجاں زنانیاںنوں جیوندیاں دبن توں پہلوں اوہناںنوں سوٹیاں نال ماریا گیا تے پھیر ٹریکٹر دے بلیڈاں نال پھٹڑ کیتا گیا کیس وچ رلتی چواں ملزماں دے خلاف انسداد دہشتگردی ایکٹ ہیٹھ مقدمہ درج کر لیا گیا ہے۔اگلے دوہواں دناں وچ سیاسی سانگے رکھن والے ہور قبائلیاں دی گرفتاری دی آس ہے کیوں جو پلس نوں اوہناں دے ایس غیر انسانی جرم وچ سدھے ساہویں رلتی ہوون دیاں شہادتاں ملیاں ہین۔ اوہناں نے وار وار ایس گل نوں دہرایا جو اہناں زنانیاں نوں بھیڑے طریقے نال قتل کیتا گیا۔ ایس توں وکھ کڑیاں نوں صحرا وچ دبن توں اک دیہاڑ پہلوں جرگہ کرن والے رکن ایس گل دا پتہ لگن توں مگروں بلوچستان پلس اوہناں دے پچھے ہے تے اوہناں نوں پھڑیا جاسکدا ہے چپ کیتیاں گھروں غائب ہو گئے ہین۔

ایس توں وکھ کئی وسیلیاں توں پتہ لگیا ہے کہ جدوں اہناں کڑیاں نوں '' اوستہ محمد '' توں پھڑن توں مگروں جتھے اوہناں عدالت وچ ویاہ کرنا سی نوں بابا کوٹ وچ اپنے گھراں وچ لیا کے قید رکھیا گیا اوتھے جرگے نے اہناں کڑیاں نوں بوہتی توں بوہتی سزا دیون دا فیصلہ کیتا۔

اہناں کڑیاں نوں قید توں باہر کڈھ کے تیز بلیڈاں والے ٹریکٹر دے ساہمنے کھلیاریا گیا، ڈرائیور دی سیٹ تے بیٹھا بندہ اہناں خوفزدہ کڑیاں تے تیز بلیڈ ورت رہیا سی جیویں ہی ایہہ کڑیاں سر تے جسم دے ہور حصیاں تے لگن والے پھٹاں دے کارن بے سرت ہو کے ڈگ پئیاں تے کسے نے اوہناں تے فائرنگ کیتی جدوں کڑیاں زمین تے خون دے تالاب وچ لمیاں ہوئیاں سن تے ٹریکٹر دے ڈرائیور نے اوہناں دے چہرے نوں مسخ کرن لئی پھیر بلیڈ ورتیا پھیر اہناں کڑیاں دے جسماں نوں اک ٹوئے ول کھچیا جتھے پھیر پوری طاقت دے نال بلیڈ راہیں اوہناں دے جسماں نوں مسخ کیتا۔ دو فٹ ڈوہنگی اوہناں دی قبر نوں ایسے ٹریکٹر نے مٹی تے پتھراں نال بھر دتا۔ اک شکاری دی شکایت تے کہ اوہنے صحرا دے جانور نوں اک کڑی دے جسم نوں کھاندیاں ویکھیا ہے پر ایہہ لوک اگلے دیہاڑ اوہناں کڑیاں نوں پھیر دبن لئی آئے اہناںمجرماں نے ایسے قبر دے وچ اہناں لوتھاں نوں پھیر داخل کیتا تے زمین پدھری کر دتی گئی۔