عزت دے ناں تے زنانیاں دا قتل جرم لکاون لئی کیتا جاندا اے
وچار ڈیسک
September 7th, 2008
اُردن دی اٹھاراں ورھیاں دی ماہا نے جدوں اپنے جدی رنڈی بازی دے پیشے وچوں نکلن دا فیصلہ کیتا تے اوہدے بھرا نے اوہنوں "عزت دے ناں تے قتل" آکھ کے مار دتا۔
ماہا اُردن دیاں اوہناں ہزاراں نہیں تے سینکڑے زنانیاں وچوں اک ہے جیہناں نوں ہر سال اوہناں دے مرد رشتے دار ٹبر دی عزت بچاؤن لئی "عزت دے ناں" تے قتل کر دیندے نیں۔
اقوام متحدہ نے رپورٹ دتی ہے کہ ایہو جہے جرم برازیل، برطانیہ، ایکواڈور، ہندوستان، اسرائیل، اٹلی، سویڈن، تے یوگنڈا ورگے غیر مسلم ملکاں دے نال نال مراکو، پاکستان اتے ترکی ورگے اسلامی ملکاں وچ وی ہوندے نیں۔
اُردن وچ ہر سال 15 توں 20 زنانیاں نوں عزت دے ناں تے قتل کیتا جاندا ہے۔ ایس سار ہن تیکر اٹھ زنانیاں عزت دے ناں تے قتل ہو چکیاں نیں۔ پچھلے سال ستاراں زنانیاں نوں قتل کیتا گیا سی۔ پر "عزت دے ناں تے قتل" ایس وسیب وچ جرماں تے پردہ پاؤن لئی ورتیا جاندا اے۔
ججاں، وکیلاں، لوکاں حقاں لئی کم کرن والیاں اتے سوجھواناں دا وچار ہے کہ ایس طرحاں دے بوہتے کیساں وچ زنانیاں بارے غلط فہمیاں نوں وراثتی جائیداد، خاندانی معاملے نبیڑن اتے اپنے جرماں نوں لکاؤن لئی ورتیا جاندا ہے۔ اُردون وچ زنانیاں لئی کم کرن والی اک ستھ دا آکھنا ہے کہ "ماہا اپنے آپ نوں رنڈی بازی دے پیشے وچوں کڈھنا چاہوندی سی، ایس لئی اوہدے بھرا نے اوہنوں قتل کیتا۔اوہدا بھرا نشئی تے مجرم سی۔ بھین نوں قتل کر کے اوہنے آکھیا کہ اوہنے خاندان دی عزت بچاؤن لئی اوہنوں ماریا۔ ایہہ گل تے کھل چکی سی کہ اوہ ایس پیشے وچ رہی سی۔ انج اوہدے بھرا نوں اُکا دو سالاں دی قید ہوئی۔"
