شکار پور: کڑیاں دیون دے فیصلے دا نوٹس، جرگے دے بندیاں دی گرفتاری دا حکم

ڈی پی او شکار پور نے جرمانے دے طور تے چھ کڑیاں مخالف قبیلیاں نوں دیون دے فیصلے دا نوٹس لیندیاں ہوئیاں جرگے دے سارے بندیاں دی گرفتاری دا حکم دے دتا ہے۔ ڈی پی او شکار پور خادم حسین رند دی ہدایت تے جرگے دے سارے بندیاں دے خلاف تھانہ گوٹھ شاہو وچ مقدمہ درج کر لیا گیا ہے۔

پلس نے ملزماں دی تلاش وچ کئی علاقیاں وچ چھاپے مارنا شروع کر دتے ہین۔ پلس موجب کچے دے علاقے چک وچ جتوئی قبیلے دے دوہواں گروپاں وچ چھ سال توں جاری پاڑ دے مُکا لئی یوسی میر نیاز حسین جتوئی دی پردھانی وچ جرگہ ہویا۔ جیہدے وچ قتل دا لزام ساہمنے آون تے جرمانے دے طور تے چھ بچیاں دا نکاح اُسے ویلے دونی عمر دے بندیاں نال پڑھا دتا گیا تے اک تیراں سالاں دی کڑی نوں پچونجاہ سال دے بندے دے نال ٹور وی دتا گیا۔