زنانیاں دے جیوندیاں دبن دے کیس دی انکوائری اک مہینے وچ پوری کیتی جاوے: سینٹ کمیٹی

سینٹ دی انسانی حقاں دی فکشنل کمیٹی نے بلوچستان وچ زنانیاں نوں جیوندیاں دبن دے واقعہ دی مذمت کردیاں ہوئیاں تحقیقاتی اداریاں نوں ہدایت کیتی ہے جو اوہ اک مہینے دے وچ رپورٹ پیش کرن چیئر مین نے کہیا جے ایہہ سیاہ کاری ہے تے پھیر سیاہ کار نوں وی ساہمنے لیاندا جاوے۔

نیشنل پولیس بیورو دے ڈائریکٹر جنرل طارق کھوسہ نے کمیٹی نوں پک کروایا جو معاملے دی تہہ تیکر چھیتی اپڑن دی کوشش کرن گے۔کمیٹی دا اجلاس پارلیمنٹ ہاؤس وچ چیئر مین ایس ایم ظفر دی صدارت وچ ہویا۔ آئی جی بلوچستان آصف نواز نے دسیا کہ مڈھلی رپورٹ موجب ایہہ واقعہ جولائی دے پہلے ہفتے پیش آیا تے ایس واقعہ تے ایف آئی آر 24 اگست نوں ہوئی تے اک ہی ایف آئی آر درج کیتی گئی۔ایس واقعے دے حوالے نال چواں ملزماں نوں انسداد دہشت گردی ایکٹ ہیٹھ پھڑ کے اوہناں توں پن چھان جاری ہے۔

اوہناں دسیا کہ دوہواں زنانیاں نوں گولیاں مار کے قتل کیتا گیا تے اوہناں نوں مگروں جیوندیاں دب دتا گیا جس ملزم نے گولیاں چلائیاں اوہ حالی تیکر ہتھے نہیں چڑھیا۔ ساک ایس واقعہ تے گل کرن توں ولا رہے ہین تے اوہ ایہہ نہیں من رہے جو قتل ہوون والیاں زنانیاں نال اوہناں دا کوئی ساک ہے۔اوہناں دسیا اک ایس ایچ او نوں معطل کیتا گیا ہے جدوں کہ ڈی پی او نوں معطل کرن دی آئی جی نے سفارش کیتی ہوئی ہے۔

سینٹ دے رکناں نے گل کردیاں ہوئیاں کہیا زنانیاں وکھریاں وکھریاں وارداتاں وچ قتل ہوئیاں۔ دوہواں دی قبر دی نشان دہی ہو چکی ہے جدوں کہ اک زنانی دی قبر دی نشان دہی ہوونا باقی ہے۔قائد ایوان رضا ربانی نے کہیا غیرت دے ناں تے قتل دے واقعہ وچ ریاست نوں مدعی ہوونا چاہی دا۔