بلوچ زنانیاں نوں جیوندیاں دبن والیاں دے خلاف درخواست پلس نے کوڑے دان وچ سٹ دتی

بلوچستان وچ جیوندیاں دب دتیاں جاون والیاں زنانیاں وچوں اک دے پیو ولوں ہتھ نال لکھی ہوئی درخواست جیہڑی پلس نوں گھلی گئی سی ہن ساہمنے آگئی ہے جیہدے نال ایس غیر انسانی کہانی دا نواں پاسا ساہمنے آوندا ہے۔ درخواست نوں حالی تیکر گجا رکھیا گیا ہے جیہدے وچ کھول کے دسیاگیا کیویں بے کس روحاں نوں چپ چپیتیاں اوہناں دے خاونداں نوں اطلاع کیتے بناء مار دتا گیا جیہڑے ہن اوہناں نوں معصوم سمجھ رہے ہین۔

غیرت دے ناں تے قتل ہوون والی عزت خاتون دو نکے نیانیاں دی ماں سی۔ اوہدے پیو نے پلس سٹیشن دے ایس ایچ او دے ناں درخواست وچ اپنی دھی دی اپنے ہی قبیلے دے ہتھوں موت دی تفصیل توں پردہ چکیا۔ مگروں علاقے دے وڈے بندیاں نے دبایاتے عطا محمد نوں ایف آئی آر واپس لین تے مجبور کیتا گیا۔ بلوچستان پلس اُس سیاسی بندے نوں جان دی ہے جیس دے دبا ہیٹھ ایس ایچ او نے کیس درج نہیں کیتا پر اوہ پلس اہلکار اپنی نوکری بچاون لئی اوہدی گرفتاری توں ڈرے ہوئے ہین۔

عطا محمد دی لکھی ہوئی درخواست '' دی نیوز '' دے کول موجود ہے جنہوں بلوچستان پلس نے کوڑے دان وچ سٹ دتا سی تے درخواست دیون والے نوں قبائلی رواجاں دے آدر وچ درخواست واپس لین لئی مجبور کیتا گیا۔ عطا محمد دے بیان موجب اٹھ سال پہلوں اوہنے اپنی دھی عزت خاتون دا ویاہ تمبو دے سمندر خان عمرانی دے پتر زاہد الیاس زاہدو نال کیتا سی۔ اوہدی دھی نے دو نیانیاں نوں جنم دتا۔ پندراں دن پہلوں جدوں عطا محمد اپنی دھی نال ملن گیا تے اوہدی دھی گھر نہیں سی۔

جدوں اوہنے آسے پاسیوں گوانڈھیاں نوں اپنی دھی بارے پچھیا تے پتہ لگیا جو اوہ اپنے خاوند نال کجھ دناں توں کوئٹہ گئی ہوئی ہے۔ جدوں اوہنے ہور پچھیا تے دسیا گیا جو اوہدی دھی چیک اپ لئی اوستہ محمد گئی ہوئی سی پر گن پوائنٹ تے تن قبائلی جواناں محمد قاسم، رحمت اللہ تے جابر اوہنوں چک لے کے گئے ہین۔ تناں اسلحے والے بندیاں نے اوہدی دھی نوں گڈی وچ پایا تے ان ڈٹھے تھاں لے گئے تے اوہدی دھی نوں '' سیاہ کار '' کہن توں مگروں قتل کر کے کِتے دب دتا۔

عطا محمد نے ایس ایچ او نوں لکھیا جو اوہدی دھی معصوم ہے تے تناں جواناں نے اوہنوں بے رحمی نال ماریا ہے۔ اوہ اک بے دل پیو وانگوں دھی دی قبر لبھ دا رہیا پر کجھ حاصل نہ ہویا۔ عطا محمد نے کہیا ہے جو اوہنوں علاقے دے لوکاں راہیں تصدیق ہوئی ہے جو اوہدی دھی نوں غیرت دے ناں تے قتل کیتا گیا تے اوہدی دھی نوں باقاعدہ اسلامی ریتاں جیہڑا کہ ہر مسلمان دا حق ہے دے بناء ان ڈٹھے تھاں تے دب دتا گیا ہے۔ عطا محمد نے پلس توں منگ کیتی جو اوہدی دھی نوں اغواء کرن توں مگروں مارن والیاں تناں بندیاں دے خلاف مقدمہ درج کیتا جاوے پر علاقے دے کجھ وڈے بندے جیہڑے ہن لک چھپ گئے ہین دے دبا دے کارن عطا محمد دی ایہہ درخواست ایف آئی آر وچ نہیں بدل سکی۔