بلوچستان وچ دو زنانیاں جیوندیاں دبیاں گئیاں: شیری رحمن

اطلاعواں دی وفاقی وزیر شیری رحمن نے گل کھولی ہے جو بلوچستان دے ضلع نصیر آباد وچ غیرت دے ناں تے قتل ہوون والیاں پنجاں زنانیاں وچوں دوہواں نوں جیوندیاں دبیا گیا سی۔ بدھ نوں ایس معاملے تے ہوون والے اک اہم اجلاس توں مگروں صحافیاں نال گل بات کردیاں ہوئیاں اوہناں کہیا مڈھلی کاہڈ موجب دوہواں زنانیاں دے کپڑیاں وچ گولیاں لگن دے نشان ہین تے ایہہ وی سچ ہے جو اوہناں تے ٹریکٹر چلایا گیا سی۔

وفاقی وزیر دے مطابق اجلاس وچ فیصلہ ہویا جو حکومت ایس واقعے وچ رلتی ملزماں نوں پھڑ کے سزا دیوے گی۔ اوہناں نے کہیا ضلع دے ایس پی تے ایس ایچ او پہلوں ہی معطل کیتے جاچکے ہین جدوں کہ کجھ لوکاں نوں پھڑیا وی گیا ہے۔ اوہناں نے دسیا جو نصیر آباد وچ جیوندیاں دبیاں جاون والیاں زنانیاں دے گھر والے ہن ایس کیس وچ استغاثہ بنن نوں تیار ہو گئے ہین جنہاں نوں پورا تحفظ دتا جارہیا ہے۔

شیری رحمن نے ایہہ منیا جو زنانیاں نوں خاندانی غیرت دے ناں تے قتل توں بچاون لئی موجودہ قنوناں وچ سقم ہین جنہاں نوں دور کرن لئی نویں قانون سازی کیتی جاوے گی۔ اوہناں نے دسیا کہ نویں قنون ہیٹھ مارا مار دا شکار ہوون والیاں زنانیاں دے واقعےاں وچ ریاست آپوں استغاثہ بن سکے گی تاں جو زنانیاں نوں انصاف مل سکے۔

چیتے رہوے جو پنجاں زنانیاں نوں بلوچستان دے اک صحرائی علاقے وچ غیرت دے ناں تے قتل کرن دیاں خبراں دو مہینے پہلوں آئیاں سن۔ اطلاعواں موجب قتل کیتیاں گئیاں تن نکیاں کڑیاں اپنی پسند دا ویاہ کرنا چاہندیاں سن۔

وفاقی وزیر اطلاعات شیری رحمن نے بھاویں ایس واقعے وچ رلتی بندیاں نوں انصاف دے کٹہرے وچ لیاون دا ارادہ ظاہر کیتا پر انسانی حقاں لئی کم کرن والیاں ستھاں ایہہ الزام لاوندیاں ہین کہ ملزم سیاسی طور تے اک وڈے قبیلے نال تعلق رکھدے ہین ایس لئی اوہناں نوں ایس مقدمے وچ غیر جانبدار پن چھان دے حوالے نال تحفظات ہین۔