زنانیاں دے حقاں دی راکھی دے جتن حالی تیکر فیدے مند ثابت نہیں ہوئے

یونی فیم دی اک نویں رپورٹ موجب زنانیاں دی اقتصادی بھلیائی تے سیاست صحت تے معیشت دے حوالے نال زنانیاں دے حقاں دی راکھی لئی پربندھیاں تے عہدے داراں دیاں پالیسیاں تے اوہناں تے عمل درآمد دے طریقیاں نوں ذمے وار کہنا چاہی دا۔

اقوام متحدہ دے سیکرٹری جنرل بن کی مون ایس رپورٹ دے چھپن بارے کہندے ہین جو عالمی یوم جمہوریت دے موقعے تے ایس رپورٹ دے تعارف نوں اک نیگ شگون سمجھنا چاہی دا۔ سیکرٹری جنرل نے کہیا زچہ بچہ دے شعبے نوں بے تحاشا اوکڑاں دا ساہمنا ہے تے ایتھے سب توں گھٹ ترقی ہوئی ہے۔ زچہ بچہ دے شعبے نوں بے تحاشا مسئلے ہین پر اوہناں دا حل وی صاف ظاہر ہے۔ اہناں مسئلیاں دا مقابلہ کرن لئی ترقی یافتہ ملکاں وانگوں ترقی پذیر ملکاں وچ وی حاملہ زنانیاں دی صحت تے ہور توجہ دینی چاہی دی ہے۔

یونی فیم دی این مری گوتز نے ایہہ رپورٹ لکھی ہے تے اوہناں دا کہنا ہے جے ایہو حالات رہے تے ہوسکدا ہے اقوام متحدہ نے دوہزار پندراں لئی جیہڑے ہدف رکھے ہین اوہ پورے نہ ہوون۔ اہناں ہدفاں وچ غربت تے وبائی مرضاں دا مقابلہ کرنا وی رلتی ہے۔

پربندھی تے عہدے داراں نوں ذمے وار کہن دے فیدیاں دے موضوع تے اقوام متحدہ دی ایس سنوائی وچ ہندوستان دے تن کارکناں نے سنن والیاں نوں تجربیاں توں خبردار کیتا۔ راجستھان وچ اوہناں دا گروپ سارے ملک وچ، رائیٹ ٹو انفارمیشن لاء منظور کران وچ کامیاب رہیا۔ اوہناں نے کٹھ پتلیاں دی مدد نال اپنیاں پنڈاں وچ ہوون والیاں میٹنگاں دی مثال دتی۔

یونی فیم دی رپورٹ موجب کڑیاں دی تعلیم دے شعبے وچ ترقی ہوئی ہے۔ ایس توں وکھ ایس رپورٹ وچ زنانیاں دے خلاف مارا مار دا وی جائزہ لیا گیا ہے۔ تے لایبیریا وچ ہنگامیاں دی روک لئی گھلے جاون والے آل ویمن پولیس یونٹس ورگے ہور یونٹس بناون دی صلاح دتی گئی ہے۔