سندھ دے ساحلی ضلع ٹھٹھہ وچ پیو نے اپنی پندراں سالاں دی دھی نوں کاروکاری دے شبے وچ پتھر مار مار کے مار دتا ہے۔ ٹھٹھہ پلس موجب پھلاں دا کاروبار کرن والے اسلم قریشی نے سرگی دے مگروں ستی ہوئی دھی نوں وار وار پتھر مار کے مار دتا۔
قتل توں مگروں اسلم نے اپنے آپ نوں پلس دے حوالے کر دتا ہے۔ اسلم قریشی نے مقامی پلس نوں دسیا کہ اوہدی دھی دے اک گوانڈھی منڈے نال ناجائز سانگے سن تے ایسے کارن اوہنے اپنی دھی نوں مار دتا ہے۔ پلس نے پندراں سالاں دی کڑی زینت دی لوتھ مقامی ہسپتال اپڑا دتی ہے تے الزم لگن والے ویہہ سالاں دے منڈے پپو نوں وی پھڑ لیا ہے پر حالی اوہدے خلاف کوئی مقدمہ درج نہیں کیتا گیا۔
صوبہ سندھ وچ کاروکاری دے الزام ہیٹھ اک ہفتے وچ پیو دے ہتھوں دھی دے قتل دا دوجا واقعہ ہے۔ دو دیہاڑ پہلوں جیکب آباد ضلع دی تحصیل ٹھل وچ محمدخان بنگلانی ناں دے بندے نے اپنی دساں سالاں دی دھی حنیفاں خاتون نوں گل وچ پھاہ دے کے مار دتا سی۔
ٹھل پلس دے اک افسر سکندر سومرو نے بی بی سی نوں دسیا کہ پنڈ لال خان پھوڑ دے وسنیک تے حنیفاں خاتون دے بھرا عرض محمد دی درخواست تے ملزم نوں پھڑ لیا ہے۔
