پاکستان وچ زنانیاں دے حقاں لئی کم کرن والیاں ستھاں دا کہنا ہے ملک وچ غیرت دے ناں تے زنانیاں دے قتل وچ کمی نہیں ہوئی ہے۔ عورت فاؤنڈیشن دی اک سروے موجب پاکستان دے کئی علاقیاں وچ صرف پچھلے چھ مہینیاں وچ دو سو پنجھی زنانیاں نوں کاروکاری الزام وچ قتل کیتا گیا ہے۔
ستھ دا کہنا ہے جو غیرت دے ناں تے قتل دے پاکستان دے کئی علاقیاں وچ ناں بدل جاندے ہین پر رسماں ریتاں اوہی رہندیاں ہین تے زنانیاں اک پھٹیچر الزام ہیٹھ قتل ضرور کیتیاں جاندیاں ہین۔
عورت فاؤنڈیشن اسلام آباد دے ملک اصغر نے بی بی سی اردو ڈاٹ کام نوں دسیا کہ ایس سروے وچ جنوری توں جون تیکر قتل کیتیاں گئیاں زنانیاں دی تفصیل شامل ہے جولائی توں ستمبر دی تفصیل ایہدے وچ شامل نہیں ہے۔
عورت فاؤنڈیشن دے سروے موجب کاروکاری توں وکھ ہور پاڑاں وچ اہناں چھیاں مہینیاں وچکار پاکستان وچ قتل کیتیاں گئیاں زنانیاں دی گنتی ست سو بائی ہے جیہدے وچ خاندانی جھیڑیاں تے رہزنی دیاں وارداتاں وی رلتی ہین۔
ملک اصغر کہندے ہین جو بلوچستان دے علاقے نصیر آباد وچ قتل کیتیاں گئیاں دو زنانیاں تے سندھ وچ اپنے پیو دے ہتھوں قتل ہوون والیاں کڑیاں نسے ہور واقعیاں نوں اکتوبر وچ جاری کیتا جاوے گا۔
پاکستان وچ غیرت دے ناں تے زنانیاں دے قتل نوں حالی سماجی حمیت ہے۔ جیہدی سجری مثال بلوچستان وچ سیاہ کاری دے الزام وچ قتل کیتیاں گئیاں دو زنانیاں ہین۔ بلوچستان دے ڈپٹی انسپکٹر جنرل پولیس سبی شبیر شیخ نے بی بی سی نوں دسیا ہے جو سیاہ کاری دے الزام ہیٹھ قتل کیتیاں گئیاں زنانیاں دے بارے اوہناں نے اک تفتیش اک اخبار رپورٹ توں مگروں شروع کیتی سی۔
پلس نوں مقامی آبادی دی مدد تے حمیت حاصل نہیں سی جیہدے کارن اوہناں دا کم ہور اوکھا ہوگیا۔ سینئر پولیس افسر موجب جدوں مدعی ہووے نہ گواہ تے اخباری اطلاعواں تے صرف لوتھاں ہی مل سکدیاں ہین پلس کسے نوں اخباری رپورٹاں تے پھانسی نہیں چاڑھ سکدی۔
اوہناں دا کہنا سی کہ جدوں علاقے دے ڈاکٹر تے پلس افسر وی سیاہ کاری نوں ٹھیک سمجھدے ہوون تے اوہ مقدمیاں دی تفتیش کھیہہ کرن گے۔پاکستان وچ کاروکاری یاں سیاہ کاری ہیٹھ زنانیاں دے قتل دے خلاف کئی غیر سرکاری ستھاں ورہیاں توں مہم چلا رہیاں ہین جیہدے کارن اوہناں ستھاں موجب وسیب وچ آگہی تے آرہی ہے پر کاروکاری دے ہیٹھ زنانیاں دے قتل وچ حالی کوئی وڈی کمی نہیں ہوسکی ہے۔
قنونی ماہراں دا کہنا ہے جو کاروکاری وچ زنانی دے قاتل کئی وار اوہدے مرد ساک ہوندے ہین جیہدے کارن دو ہزار چار دا ٖغیرت دے ناں تے جرم والا ایکٹ وی غیر موثر بن جاندا ہے کیوں جو زنانی دے ایس قتل نوں کمپاؤنڈیبل افینس بنایا گیا ہے جیہدے وچ اک مرد ساک اپنے دوجے مرد ساک نوں عدالت وچ خون معاف کر دیندا ہے تے مجرم سوکھیاں چھٹ جاندے ہین۔
عورت فاؤنڈیشن دی سروے موجب پاکستان وچ کاروکاری الزام ہیٹھ قتل کیتیاں گئیاں زنانیاں دے مقدمے مقامی عدالتاں وچ ہولی ہولی چلدے ہین جیہدے کارن درخواست دیون والے نوں چھیتی انصاف دی آس نہیں رہندی۔
سروے موجب ملک وچ کاروکاری دے الزام ہیٹھ پچھلے چھ مہینیاں وچکار قتل ہوون والیاں زنانیاں دے کیساں وچوں صرف دو ملزماں نوں سزا ہوسکدی ہے۔ رہندے سارے کیس متعلقہ عدالتاں وچ سنوائی ہورہی ہے۔
سماجی ماہراں دا کہنا ہے جو سیاہ کاری یاں کاروکاری دی آڑ وچ زنانیاں دے قتل دے سلسلے دا پاکستان وچ پورا مُکا تے حالی ہو نہیں سکدا پر نویں جمہوری حکومت قانون سازی تے قنون تے سختی نال عمل راہیں زنانیاں دے خلاف رسماں ریتاں دے ناں تے جاری قتل وچ کمی ضرور کروا سکدی ہے۔
