سٹیٹ بینک دی گورنر اک زنانی ہے پر پاکستان دے بینکاں وچ پیسے دے معاملیاں تے پیسے لین دین وچ زنانیاں دی گواہی قبول نہیں کیتی جاندی۔ بینک افسر کہندے ہین جو ایہہ گذریل فوجی پردھان ضیاء الحق دے دور وچ بنن والے شہادت دے قنوناں موجب ہے جدوں کہ ماہر کہندے ہین قنون شہادت وچ انج دی کوئی گل نہیں جیہدے موجب زنانی دی گواہی قبول کرن دے قابل نہ ہووے۔
پاکستان دے اک انگریزی روزنامے وچ پیر نوں اک خبر چھپی جیہدے موجب بینکاں وچ مالی لین دین وچ زنانیاں دی گواہی قبول نہیں کیتی جاندی۔ بینک افسراں دا کہنا ہے جو قنون شہادت سن اُنی سو چوراسی توں لگے ہوئے ہین تے اوہناں موجب ہی پیسے دے معاملیاں تے پیسہ لین دین وچکار طے ہوون والے سمجھوتیاں وچ صرف زنانیاں دی گواہی قبول نہیں کیتی جاندی۔
مرکزی بینک دے ترجمان سید وسیم الدین دا کہنا ہے جو بینک قانون شہادت دی پاسداری کر رہے ہین تے سٹیٹ بینک ایس قنون نوں بدل نہیں سکدا جیہدے موجب دو مرد یاں پھیر اک مرد تے دوہواں زنانیاں دی گواہی قبول کیتی جاندی ہے جدوں کہ ایس قنون موجب مرد دے بناء کلی زنانی دی گواہی قبول کرن دے قابل نہیں ہے۔
اوہناں کہیا قنون وچ ترمیم دا کم پارلیمنٹ دا ہے تے ملکی ادارے قنون دی پاسداری کردے ہین، قنون سازی نہیں۔
پر حکمران جماعت دے سینیٹر بابر اعوان بینکاں دے ایس دعوے نوں رد کردیاں ہوئیاں کہندے ہین جو پاکستان دے قنون وچ عورت دی گواہی قبول کرن دے قابل ہے۔ اوہناں موجب پاکستان وچ کوئی وی قنون قرآن تے سنت دے خلاف نہیں ہوسکدا۔
اوہناں دا کہنا سی جو قنون شہادت اُنی سو چوراسی جیہڑا گواہی ولوں قنون ہے ایہدے وچ صاف لکھیا ہویا ہے جو مرداں تے زنانیاں دوہواں دی گواہی قبول کرن دے قابل ہے تے ایہدے توں وکھ پاکستان دے آئین دے آرٹیکل 25 وچ لکھیا ہویا ہے جو زنانی تے مرد وچ کوئی فرق نہیں کیتا جاسکدا۔ ایس لئی جنہے کسے نے انج کیتا ہے اوہ یاں تے قنون جاندا نہیں یاں اوہ قنون دا بھگوڑا ہے۔'
ضیاء الحق دے دور وچ بنائے جاون والے قنون شہادت دے آرٹیکل ستاراں وچ بینکاں دے نال مالی لین دین دے بارے لکھیا گیا ہے۔ ایس سوال دا جواب دیندیاں ہوئیاں ملک دے مشہور وکیل گذریل جسٹس رشید اے رضوی کہندے ہین ' ایس قنون موجب مالی لین دین تے تحریری سمجھوتیاں وچ دوہواں مرداں دی گواہی یاں پھیر اک مرد تے دوہواں زنانیاں دی گواہی ہوونی چاہی دی ہے تاں جو اک زنانی بھل جاوے تے دوجی اوہنوں چیتا کروائے۔ پر جے پہلی زنانی نوں سارا کجھ پتہ ہے تے پھیر دوجی زنانی دی گواہی دی اُکا لوڑ نہیں ہے۔'
رشید رضوی دا کہنا ہے جو قنون شہادت وچ ایس رولے نوں دور کرن لئی صرف پارلیمنٹ ہی مختار ہے جے اوہ چاہے تے ایس قنون وچ ترمیم کر سکدی ہے۔ سن چوراسی وچ بنن والے قنون دے مگروں پیپلز پارٹی دی گذریل چیئر پرسن بینظیر بھٹو دو واری ملک دیاں وزیر اعظم رہیاں پر اوہناں دے وارہے وچ وی ایس پاسے توجہ نہیں دتی گئی۔
ہن ویکھنا ایہہ ہے جو پیپلز پارٹی دی حکومت ایس واری ایس قنون وچ رولے نوں مکاون لئی کیہہ کردی ہے۔
