'عید تے اوہناں دی ہوندی ہے جیہڑے اپنے ٹبر وچ ہوندے ہین جیہڑے اوہناں توں دور ہین ایہہ اوہناں لئی تے عام دیہاڑ ہی ہوندا ہے' ایہہ پینتی سالاں دی زینت دے لفظ ہین جیہڑی اپنے نیانیاں توں دور دارالامان دی چاردیواری وچ عید منا رہیاں ہین۔
زینت نے خاوند دے ظلم تے زیادتیاں توں اَک کے گھر تے نیانیاں نوں چھڈ دتا سی۔ ماپیاں نے وی اوہناں نوں اپنے گھر پناہ دیون توں انکار کیتا جیہدے مگروں اوہ کراچی وچ بے سہارا زنانیاں دے گھر ' پناہ ' وچ رہندیاں ہین۔
' پناہ ' شہر وچ زنانیاں دے حقاں تے راکھی لئی کم کرن والیاں کارکناں نے بنایا ہے جیہدے وچ عدالت ولوں گھلیاں گئیاں زنانیاں توں وکھ بے سہارا زنانیاں وی آکے رہندیاں ہین۔
زینت نے اپنی یاد دے ورقیاں نوں پرت دیاں ہوئیاں دسیا کہ ہر عید دا دیہاڑ اوہناں لئی بڑا مصروف ہوندا سی۔ نیانیاں نوں تیار کرنا، اوہناں لئی سارا دیہاڑی کئی کئی کھانے بناونا اوہناں دی مصروفیت وچ شامل سی۔ اوہناں دے تن نیانے ہین جنہاں نوں اوہ ہر ویلے یاد کردیاں ہین تے اوہناں دی کمی محسوس کردیاں ہین۔ اوہناں دا کہنا ہے جو بندہ کدی اپنی اولاد نوں نہیں بھلا سکدا بھاویں دنیا دی کسے وی نکرے چلا جاوے۔
پناہ وچ رہندیاں ہوئیاں زینت نے کجھ پیسے جوڑے ہین جنہاں نال کپڑے تے تحفے خرید کے نیانیاں لئی گھلے ہین۔ اوہناں موجب اوہناں دے خاوند نیانیاں نوں اوہناں نال ملن آون دی اجازت نہیں دیون گے پر مگروں ٹیلی فون تے گل کر لین گے۔
' پناہ ' دی ڈائریکٹر عظمیٰ نوارانی دسدیاں ہین جو عید تے اہناں زنانیاں لئی نویں جوڑیاں دا پربندھ کیتا جارہیا ہے۔اوہناں نوں چوڑیاں تے مہندی وی دتی جاندی ہے۔' ایہہ کوشش کیتی جاندی ہے اوہناں نوں گھر ورگا ماحول محسوس ہووے۔' پہلوں چاند رات تے چوڑیاں پوان لئی اہناں زنانیاں نوں بازار کھڑیا جاندا سی پر حالات دے کارن انج نہیں ہوسکدا۔ کوشش ہوندی ہے جو عید دے دن کوئی وی اوہناں نال ملن لئی آجاوے۔ کمیونٹی نوں احساس ہووے کہ انج دیاں زنانیاں ہین جیہڑیاں گھروں دور بیٹھیاں ہین۔'
اہناں زنانیاں وچ اٹھائی سالاں دی گلناز وی رلتی ہین جیہڑی چار سال پہلوں اپنے گھروالیاں نال رُس کے حیدر آباد چلیاں گئیاں سن جتھوں اوہناں نوں اغوا کر لیا گیا۔ اوہ اہناں لوکاں دے چنگل توں نسن وچ کامیاب تے ہوگئیاں پر گھر والیاں نے اوہناں نوں قبولن توں انکار کردتا۔
اوہ دسدیاں ہین اوہ پڑھ کے اپنے پیراں تے کھلون دی چاہوند سن پر پیو دا زور سی جو اوہناں دا ویاہ کروایا جاوے تے ایسے کارن گھر چھڈ کے بھین دے گھر ٹر گئیاں۔ بھین نال کسے نکی جیہی گل تے لڑن توں مگروں اوہناں نے اوہ گھر وی چھڈ دتا جیہدے مگروں توں لے کے اوہ ٹھوکراں کھا رہیاں ہین۔ گلناز موجب جیہڑی کڑی گھروں چار سال باہر رہی ہووے اوہنوں اوہدے گھر والے کیویں قبول کر سکدے ہین۔
اوہناں دا کہنا ہے جو اوہناں دی چاہ ہے جو پناہ والے اوہناں دے ویاہ دا بندوبست کر دیون تاں جو اوہ گھر وساون۔ ایہدے توں وکھ اوہناں نوں عید یاں کوئی ہور خوشی نہیں رہی ہے۔
پندراں سالاں دی نورین کراچی وچ اک بنگلے وچ صفائی دا کم کردیاں سن جتھوں دی مالکن نے اوہناں تے چوری دا الزام لایا سی اوہناں نوں دو دن تھانے وچ وی رکھیا گیا جیہدے مگروں اوہ پناہ وچ آگئیاں۔اوہ ماپیاں کول نہیں جانا چاہندیاں جدوں کہ اوہناں نوں چیتا ہے پچھلی عید تے وی اوہناں نے نویں کپڑے بنائے سن تے گھروالیاں نال گھمن پھرن گئیاں سن پر ہن اوہ کہندیاں ہین ایہہ عید جیویں ایتھے منائی جاوے گی اوہ وی اُنج ہی منا لین گئیاں۔
کراچی توں وکھ حیدر آباد تے سکھر دے دارالامان وچ وی انج دیاں کئی زنانیاں ہین جنہاں دا اپنے نیانیاں تے ماپیاں توں دور چار دیواری وچ عید دا دیہاڑ لنگھ جاوے گا۔ فرزانہ نوں 'پناہ ' وچ اک مہینہ ہوون والا ہے۔ اوہ وی خاوند دے ظلم ستم توں اک کے گھر چھڈ آئیاں ہین۔ اوہناں موجب اوہناں دا خاوند نشہ کردا جیہدے مگروں مار کٹ کردا تے زبردستی وی کردا سی۔ اوہ تناں نیانیاں نوں چھڈ کے آئیاں ہین۔
اوہناں دا کہنا ہے جو عید دا دن نیانیاں دے بناء عجیب تے لگے گا پر ساری حیاتی تے انج نہیں لنگھدی۔ اوہناں دا کہنا ہے جو اوہ پہلوں طلاق لین گئیاں جیہدے مگروں نیانیاں ولوں سوچن گئیاں۔
