بلوچستان دے ضلع نصیر آباد وچ ڈھائی مہینے پہلوں پنجاں زنانیاں دے سیاہ کاری دے الزام وچ قتل دے واقعے توں مگروں چویہہ ہور واقعے ہو چکے ہین جنہاں وچوں چویہہ زنانیاں سنے پینتی بندے مارے گئے ہین۔
غیر سرکاری ستھ عورت فاؤنڈیشن موجب اہناں واقعیاں وچوں کئی ضلع نصیر آباد تے ضلع جعفر آباد وچ پیش آئے ہین۔ ایس ستھ دے عہدیدار خلیجی نے دسیا کہ اوہ اہناں دناں وچ اوہناںو اقعیاں دی ہن چھان کر رہے ہین تے جدوں توں میڈیا نے نصیر آباد وچ پنجاں زنانیاں دے قتل دے واقعیاں نوں چکیا ہے تے اوہدے مگروں چویہہ واقعے پیش آئے ہین۔
علاؤ الدین خلجی موجب اہناں واقعیاں وچ چویہہ زنانیاں تے گیاراںمرد مارے گئے ہین جدوں کہ تن زنانیاں اقدام قتل وچ پھٹڑ ہوئیاں ہین۔ اوہناں نے دسیا کہ پچھلی چھماہی وچ ستر زنانیاں تے پنجھی مرد سیاہ کاری دے الزام وچ مارے گئے ہین۔اوہناں نے کہیا اہناں واقعیاں دی اطلاع پندراں جولائی توں مگروں میڈیا یاں غیر سرکاری ستھاں دے نمائندیاں راہیں اوہناں تیکر اپڑیاں ہین۔
زنانیاں دی بھلیائی دے کم کرن والی اک زنانی صائمہ جاوید نوں میں پچھیا کہ نصیر آباد دے واقعہ توں مگروں ایہہ ودھے ہین تے اوہناں کہیا ایہہ واقعے روٹین مطابق ہی پیش آرہے ہین پر ہن ایہہ واقعے رپورٹ ہورہے ہین۔ صائمہ جاوید موجب نصیر آباد تے جعفر آباد دے علاقیاں وچ زنانیاں نوں گندہ کہہ کے مار دتا جاندا ہے۔
اک ہور غیر سرکاری ستھ سحر دے عہدیدار عبدالودود نے دسیا ہے جو اہناں واقعیاں نوں کئی وار میڈیا وچ گھٹ ہی تھاں دتی جاندی ہے جدوں کہ بلوچستان دے الٹ ہور صوبیاں وچ ایہہ واقعے رپورٹ ہوندے ہین۔ اوہناں کہیا پنجاں زنانیاں دے واقعے نوں صرف ایس لئی بوہتی کوریج ملی کہ جیوندیاں دبن دا عنصر چھایا رہیا ہے۔
بلوچستان وچ وی ایہہ خیال کیتا جاندا ہے جو میڈیا تے غیر سرکاری ستھاں صوبے وچ جاری آپریشن تے سیکورٹی فورسز دے ہتھوں بے گناہ بندیاں دے قتل تے چپ ہین پر اہناں پنجاں زنانیاں دے قتل نوں ودھا چڑھا کے پیش کیتا جارہیا ہے۔
انسانی حقاں دیاں ستھاں دا کہنا ہے جو سیاہ کاری دے واقعیاں نوں ڈکن لئی ضروری قنون سازی تے پھیر اوہدے تے عملدرآمد ضروری ہے۔ اہناں ستھاں دے عہدیداراں نے کہیا ہے جو نصیر آباد پلس پربندھیاں نے پہلوں عدالت نوں وی ایہو کہیا جو ایہہ واقعہ پیش ہی نہیں آیا ہے تے پھیر رولے توں مگروں دوہواں زنانیاں دیاں لوتھاں برآمد کر لئیاں گئیاں سن۔
