ضلع گھوٹکی وچ تحصیل اوباڑو ڈہرکی ،میر پور ماتھیلو دے پنڈاں تھاواں وچ اج وی زنانیاں دا وپار جاری ہے جیہڑا وسیب دا وڈا ہرکھ ہے۔ گھوٹکی دے کئی علاقیاں وچ اک سو پنجاہ توں ودھ زنانیاں نوں چالی ہزار توں ڈیڈھ لکھ تیکر ویچیا گیا ہے۔ پچھلے دناں وچ اک لکھ ویہہ ہزار روپئے وچ وکن والی زنانیاں نوں اک تھاں توں دوجی تھاں کسے پنڈ وچ کِتے کھڑیاجارہیا سی کہ موٹر وے پلس نے پھڑ لیا تے اوباڑو پلس دے حوالے کر دتا۔
ایس موقعے تے بتی سالاں دی جمیلہ نے دسیا کہ اوہنوں نشے والا ٹیکہ لا کے خورے کِتے کھڑ رہے سن جدوں مینوں سُرت آئی تے میں نیشنل ہائی وے تے سی تے اوہنے موٹر وے پلس نوں ویکھ کے رولا پا دتا جیہدے تے ملزم نوں پھڑ لیا گیا زنانی دے روندیاں ہوئیاں دسیا کہ اوہدے دو نیانے ہین جنہاں بغیر اوہ رہ نہیں سکدی اوہنے دسیا کہ اوہنوں پتہ لگیا ہے جو اوہنوں اوباڑو چاچز قبیلے دے اک بندے نوںویچ دتا گیا۔ پلس دی پکڑ وچ ملزم محراب چاچز نے دسیا کہ زنانی نوں اوہدے مامے کولوں خریدیا ہے تے پٹان نے جیہڑے پیسے لئے ہین اوہ واپس لے کے اوہنوں واپس دے دیون گے مگروں پلس نے زنانی نوں سیکنڈ سیشن جج دی عدالت وچ پیش کیتا جتھے زنانی دا بیان لین توں مگروں اوہنوں دارلامان گھل دتا گیا تے مگروں اوہدی ماں اختر بی بی دے حوالے کر دتا گیا۔
ایس توں وکھ پنجاب تے بلوچستان دے کجھ علاقیاں دے سیکڑیاں کڑیاں منڈیاں نوں اغوا کر کے سندھ وچ ویچن دی گل کھلی ہے جتھے اوہنوں کولوں جبری مزدوری کروائی جاندی ہے تے زیادتی کیتی جاندی ہے۔ فیصل دے علاقے مہندی محلہ توں تن سال پہلوں اغوا ہوون والیاں دو بھیناں روبینہ سلیمہ تے نازیہ وچوں چھٹن والیاں دو ہواں بھیناں روبینہ تے سلیمہ دا کہنا ہے جو اوہناں نوں اغوا کرن والے وچلے سندھ تھانہ یارو لوند دے علاقے گوٹھ سندھواں وچ لے گئے جتھے پنجاب دے کئی شہراں توں اغوا کر کے لیاندیاں گئیاں اک سو پنجاہ کڑیاں قید سن۔
ایس ڈیرے تے سارے سندھ وچوں کڑیاں دے وپاری آوندے تے دس ہزار توں اسی ہزار تیکر کڑیاں ویچیاں جاندیاں سن کڑیاں دا مُل اوہناں دے سوہناپے تے عمر دے حساب نال لگدا۔ کڑیاں دا کہنا ہے جو اوہ ایس گل دیاں گواہ ہین جو اوہناں دے ساہمنے اک سو توں ودھ کڑیاں وکیاں جنہاں وچ اوہناں دی نکی بھین نازیہ وی شامل ہے جنہوں چھہتر ہزار وچ اک زمیندار نوں ویچیا گیا۔
