اٹلی وچ اک بندے نے پچھلے پنجاہ ورھیاں توں اپنی گھر والی نوں گھر وچ ای بندی بنائی رکھیا۔ اوہنوں ناں تے گھروں باہر جاون دی اجازت سی اتے نہ ای کسے نال بولن چالن دی۔ ایتھوں تک کہ اوہنوں ٹی وی ویکھن دی وی مناہی سی۔ دل دے روگ پاروں اوہنوں ہسپتال وچ داخل کیتا گیا جتھے اوہنوں ڈاکٹراں نوں اپنی کہانی سنائی۔
زنانی دا آکھنا ہے کہ اوہدے ساڑ دے مارے کھسم نے اوہنوں اوس دن توں ای بندی بنایا ہویا سی جیس دن 1958 وچ اوہدا ویاہ ہویا سی۔ ہن دوہیں جی ستراں دے پیٹے وچ نیں تے دسیا جاندا ہے کہ اوہناں دے دو جوان بچے وی نیں۔ جدوں بندہ گھروں باہر جاندا سی تے باہروں جندرا مار کے اوہنوں گھر تاڑ جاندا سی۔ ایس توں اڈ اوہ زنانی نوں ماردا کُٹڈا وی سی۔
پولیس نے خبر ہوون تے اچن چیتی اک مقامی وکیل نال گل کیتی ہے۔ پولیس دا آکھنا ہے کہ ایہہ بڑی ماڑی گل ہے کہ زنانی اپنے ای کھسم ہتھوں پنجاہ ورھیاں توں بندی خانے وچ حیاتی لنگھاؤندی رہی۔ وکیل نے عدالت وچ عرضی دتی ہے کہ اس زنانی نوں اوہدے کھسم دے گھروں کڈھ کے کسے راکھویں تھاں تے پچایا جاوے تے بندے دے خلاف کاروائی کیتی جاوے۔
