ایران وچ کاراں بناون والی سرکاری کمپنی، ایران خودرو نے اک ایہو جہی کار بنائی ہے جیہڑی اچیچا زنانیاں لئی بنائی گئی ہے۔
ایس کار وچ پارکنگ لئی امدادی آلے تے ٹائر بدلن لئی اک الیکٹرانک جیک لایا گیا ہے جیہدے نال زنانیاں بڑی سوکھت نال ٹائر بدل سکدیاں ہین۔ ایس توں اڈ گڈی وچوں وی ایہو جہی بنائی گئی ہے جیہدے نال زنانیاں نوں کار چلاون وچ بڑی سوکھت ہووے گی۔
ایہدے وچ اک الارم لایا گیا ہے جیہڑا ٹائر پنکچر ہوون تے زنانی ڈرائیور نوں دسے گا۔ آٹومیٹک گیئر بکسا ہے، تے بتیاں تے ہور شیواں نوں ویکھن لئی وی اچیچے پربندھ کیتے گئے ہین ایس توں اڈ گڈی وچ بالاں دے پرچاون لئی آڈیو تے ویڈیو دا وی اچیچا سامان لایا گیا ہے۔
ایران خودرو دا آکھنا ہے کہ ایہہ کار اسلامی ملکاں وچ زنانی ڈرائیوراں دی ودھدی ہوئی گنتی نوں ویکھدیاں بنائی گئی ہے۔ ایہہ کار اگلے جون وچ زنانیاں دے عالمی دن دے موقعے تے منڈی وچ لیاندی جاوے گی۔
ایران خودرو دے مینجنگ ڈائریکٹر وحید نجفی دا آکھنا ہے کہ اوہناں نوں یقین ہے کہ ایہہ کار بڑی مشہور ہووے گی۔ زنانیاں دی ایہہ کار مُڈھ وچ ملکی لوڑاں پوریاں کرے گی۔ زنانیاں دیاں لوڑاں بندیاں نالوں وکھ ہوندیاں نیں ایس لئی ایہہ کار ویکھن وچ وی عام کاراں نالوں وکھ تے زنانی کار جاپے گی۔
