آسٹریلیا دی ٹین ایج مٹیاراں نوں سمندر کنڈھے سن باتھ ویلے اپنے چم اُتے اپنے فون نمبر لکھواؤن دے خطرے توں خبردار کیتا گیا اے۔
بالڑیاں دی راکھی دیاں ایجنسیاں دا آکھنا اے ایہو جیہے کم نال غلط نظر پیندی ہے۔ جوان کڑیاں دے ایک جتھے دی بلیو زنک رنگے سن بلاک نال اپنی بکنیاں تے موبائل نمبر لکھیاں مورتاں چھپیاں ہین۔ چودھاں تے پندرہاں ورھیاں دیاں کڑیاں آکھنا ہے پئی اوہناں سڈنی دے گڑھ توں دکھن ول کرونولا بیچ تے اُتر ول مینلی بیچ "منڈے لبھن" لئی پینڈا کیتا تے آس سی پئی اوبھڑ سُبھاء نال کچھ کالز ہون گیاں۔ پر نیانیاں دی راکھی دے ادارے دا خیال ہے اِنج غلط قسم دا اثر پیندا ہے۔
پندرہ ورہیاں دی لزی دا مننا اے پئی بڈھڑیاں ولوں چھیتی جواب آیا " اک بڈھا میرے نال گل کرنا چاہوندا سی۔ اوہ ساڈیاں مورتاں وی کھچن دے جتن کر رہیا سی۔ نیانیاں دے راکھی دے ماہراں نے خبردار کیتا ہے کہ الہڑ جوانی والے ایس طریقہ دی نقل نہ کرن۔گرل فورس دے لکھاری نِکی گولڈ سٹائن دا آکھنا اے کہ ایہہ ورتارا بہوں خطرناک ہے۔ "اسیں کُڑیاں نوں ہدایت کراں گے پئی اوہ اپنے فون نمبر کتھے وی ظاہر نہ کرن جیس نال اوہ نشانہ بن سکدیاں ہن۔" ایہہ گل اوہناں آسٹریلوی ٹیلیگراف نال گل کردیاں آکھی۔
