صوبہ سرحد: پچھلے دوہواں مہینیاں وچ زنانیاں تے مارا مار دے 261 کیسز

سرحد وچ پچھلے دوہواں مہینیاں وچ زنانیاں تے مارا مار دے دو سو اکاٹھ کیسز رپورٹ ہوئے ہین۔ صرف ضلع پشاور وچ ستانوے زنانیاں نوں مارا مار دا نشانہ بنایا گیا۔ عورت فاؤنڈیشن سرحد نے اخباراں، ہسپتال تے ویمن کرائمز سینٹراں توں لئی گئی معلومات دے مڈھ تے رپورٹ بنائی ہے۔جیہدے موجب دوہواں مہنیاں وچکار صوبہ سرحد وچ اک سو اُنتی زنانیاں نوں قتل کیتا گیا۔ اکونجاہ زنانیاں تے قاتلانہ دھاڑے کیتے گئے جدوں کہ چویہہ زنانیاں نے گھریلو حالات توں تنک آ کے آپ ہتیا کیتی۔ رپورٹ موجب ستاراں زنانیاں نوں ساک دے پھڈے توں اغوا کر کے جدوں کہ خاندانی عزت دے ناں تے دوہواں زنایاں نوں ماریا گیا۔ زنانیاں تے مارا مار دے حوالے نال پشاور سب توں اگے رہیا۔ جدوں کہ مردان چار سدہ نوشرہ تے سوات وچ دس توں ودھ واقعے رپورٹ کیتے گئے۔