وزیر اعلی سندھ دے الیکشن دے حلقے دی ستاراں سالاں دی کڑی تسلیم سولنگی نوں کہیا جاندا ہے جو ایس سال مارچ وچ بھیڑے مارا مار توں مگروں قتل کیتا گیا۔ ایس بے وس مخلوق نوں اوہدے قبیلے دے وڈیاں نے سب توں پہلوں بھکھے، وڈھن والے کتیاں اگے نسن تے مجبور کیتا تے اوہدے مگروں غیرت دے ناں تے قتل ہوون والی ایس کڑی دے نیم مردہ جثے جنہوں کتیاں نے وڈھ کھادا سی، گولیاں ماریاں گئیاں۔
ایس علاقے دے اک گذریل یونین ناظم نے خیر پور توں دی نیوز نال گل بات کردیاں ایس واپری دی پک کیتی پر اپنا ناں نہیں دسیا۔صوبہ سندھ وچ سولنگی قبیلے دے پردھان سائیں اللہ داد سولنگی نے کہیا جاندا ہے کہ ایس جرگے دی پردھانی کیتی جیہدے فیصلے ہیٹھ کڑی نوں قتل کردتا گیا۔
ایشین ہیومن رائٹس کمیشن ولوں جاری کیتی گئی رپورٹ موجب اصل وچ ایہہ غیرت دے ناں تے قتل نہیں سی۔ ایس کڑی نوں ایس لئی '' کاری '' کر دتا سی جو زمین دے پھڈے تے اوہدے خاندان دے ہی بندہاں نے ایس توں پہلوں اک ہور قتل کردتا سی جیہدا پج لایا گیا۔انسانی حقاں دی ستھ ایشین ہیومن رائٹس کمیشن موجب زمین دے پھڈے توں مگروں ستاراں سالاں دی تسلیم سولنگی تے دبا پایا گیا سی جو اوہ اپنے ماپیاں توں ساری جائیداد سنے چھ کلے زمین تے ڈنگراں دا فارم اپنے چاچے نوں دیون لئی آکھے۔ اوہدے انکار تے سازش کرن والیاں نے اوہدے پیو گل شیر نوں اغوا کر لیا تے اوہدے وڈے بھرا دے گھر اوہنوں نظر بند کردتا۔
رپورٹ موجب ست مارچ دوہزار اٹھ نوں ایسے تھاں تے تسلیم سولنگی نوں مارا مار دا نشانہ بنایا گیا کتیاں دے نسن تے مجبور کیتا گیا جنہاں نے اودوں تیکر کڑی دیاں لتاں تے وڈھیا جدوں تیکر اوہ تھک کے زمین تے ڈگ نہ پئی تے ایہدے مگروں کتے اوہنوں وڈھ کھاندے رہے۔ تے مگروں اوہدے پیودے ساہمنے ضمیر سولنگی نے کڑی نوں گولی مار کے مار دتا۔ایس موقعے تے کڑی دا چاچا کریم بخش تے اک مقامی کونسلر وی سی۔ پلس نے پھڈے تے قتل دے معاملے تے اہناں تگڑے بندیاں دی موجودگی دے کارن کوئی ایکشن نہیں لیا۔ دو مہینے مگروں کریم سولنگی نے اک جرگہ کیتا تاں جو قتل دا پج لایا جاسکے تے ساریاں بھراواں لئی معافی لئی جاسکے۔ جرگے دا پردھان سائیں اللہ داد سی جیہڑا کہ پیر جوگوٹھ دا اک تگڑا زمین دار ہے۔ایس توں وکھ علاقے دے اک امیر بندے عبدالقیوم تے قاتلاں تے قبیلے دے وڈیاں نے تڑھی لا کے چار لکھ روپئے جرمانہ لایا تے اوہدے کولوں منوایا کہ اوہدے تسلیم نال ناجائز سانگے سن۔ اوہنوں تڑھی لائی گئی جے اوہنے انکار کیتا تے اوہنوں قتل کردتا جاوے گا۔
ایشین ہیومن رائٹس نے اپنے پریس نوٹ وچ کہیا ہے جو قنون دی حکمرانی تے چنگے عدالتی نظام دی موجودگی وچ طاقتور لوک جیہڑے کئی پدھراں تے لوکائی دے نمائندے وی ہین اپنی طاقت وسیب دے محدود پوش دے خلاف ورت رہے ہین تے سزا توں بچے ہوئے ہین۔ گل شیر دے خاندان نے اپنا گھر تے پنڈ چھڈ دتا ہے اوہدی ساری جائیداد قاتلاں دے کول ہے۔ پر پلس تے لوکائی دے نمائندیاں نے اوہناں دی حمیت وچ کجھ نہیں کیتا۔طاقتور لوک جاندے ہین جو پلس تے قنون نوں کسے وی قیمت تے خریدیا جاسکدا ہے ایس لئی اوہ پربندھیاں دیاں کمزوریاں توں فیدا چک دے ہین۔ ایشین ہیومن رائٹس نے حکومت تے زور دتا ہے جو اوہ عزت دے ناں تے قتل کیتی جاون والی تسلیم سولنگی دے قتل دی بھیڑی واپری دی پن چھان کرائے۔ ایس معصوم کڑی دا خوفناک قتل ایس لئی کیتا گیا سی تاں جو اوہدے پیو دی زمین تے قبضہ کیتا جاسکے۔ ایہہ ذاتی پاڑ نبیڑن لئی غیرت دے ناں تے قتل نوں ورتن دی اک ہور مثال ہے جیہڑی کہ بوہت ہی ہرکھ والی ہے۔
