گوانتا ناموبے بگرام جیل وچ قید زنانیاں تے جنسی مارا مار:برطانوی صحافی ریڈلے

افغانستان وچ طالبان دی قید وچ اسلام قبولن والی برطانوی صحافی یوان ریڈلے نے الزام لایا ہے جو گوانتا نوموبے تے بگرام جیل وچ قید زنانیاں نوں جنسی تے ذہنی مارا مار دا نشانہ بنایا جاندا ہے۔ دنیا وچ مہذب قوم ہوون دا دعویٰ کرن والے لوک اصل وچ سب توں وڈے ات وادی ہین۔ اوہ اج پریس کانفرنس وچ ہور گلاں کھولن گئیاں۔ پچھلے دیہاڑ پرامن پاکستان فورم ہیٹھ اپنے آدر وچ اکٹھ نال گل کردیاں اوہناں آکھیا انسانی حقاں دے علمبرداراں دا اصلی چہرہ گوانتا ناموبے تے بگرام دیاں جیلاں وچ قیدیاں دی حالت توں ویکھیا جاسکدا ہے، پاکستانی میڈیا امریکہ تے برطانیہ نالوں ودھ کے آزاد ہے جیہڑا امریکہ دے بھیڑے ارادیاں نوں ننگیاں کرن وچ اپنا کردار ادا کرسکدا ہے۔

نائن الیون توں مگروں ات واد دے خلاف جنگ وچ امریکہ دا اتحادی ہوون پاروں پاکستان نے بھاری قیمت ادا کیتی ہے۔ اوہناں کہیا اسلام قبولن دا کارن طالبان دا چنگا ورتارا ہے۔ مغربی میڈیا وچ طالبان دے خلاف بھیڑے خیالاں نوں ودھا چڑھا کے دسیا جاندا ہے اوہ سب غلط ہین افغانستان وچ طالبان دے پربندھ وچ کڑیاں دے سکول وی تعلیم دا سلسلہ جاری رکھے ہوئے ہین۔افغانستان وچ امریکہ ولوں جاری جنگ وچ پاکستان نوں اک انج دے سنگی دی لوڑ سی جیہڑا غیر مشروط طور تے ایس نازک دور وچ اوہناں دی مدد کردا پر پاکستان ولوں تعاون دے مگروں وی عالمی برادری وچ ابھرن والے بھیڑے خیالاں نے سارے جگ وچ وسنیک پاکستان نوں بوہت اوکڑاں وچ پا دتا، پاکستان وچ قبائلی علاقے ات واد دے پکڑ وچ آگئے۔ یوان ریڈلے نے کہیا قبائلی علاقیاں وچ وسنیک لوک تے افغانستان دے پسماندہ علاقیاں وچ آباد شہری معصوم ہین جنہاں نوں نائن الیون دے واقعے دا پتہ نہیں سی پر مُل اوہناں نوں بھرناپیا۔