اُستانی نے ایڈز دے مریض نال لو میرج کر لئی دوہویں چنگی زندگی گزارن لگ پئے۔ ملتان دی وسنیک روبینہ اشرف نے ڈیلی ٹائمز نوں دسیا کہ کجھ سال پہلوں اوہنے اپنی اک سہیلی توں جدوں ایہہ سنیا کہ اوہدے اک ساک نوں ایڈز ہے تے اوہ زندگی موت دی چھچھوپنج وچ پیا ہے جیہدے تے میں اپنی سہیلی کول مریض ویکھن دی چاہ دا وکھالا کیتا۔ میں عاصم نوں ویکھن ہسپتال گئی جیہڑا کہ اُس ویلے بوہت ہی بھیڑی حالت وچ سی۔ میں عاصم دی ہمت تے حوصلے نوں بڑا سلاہیا۔
روبینہ جیہڑی کہ اک سکول وچ استانی ہے نے دسیا کہ اک دیہاڑ میں اوہنوں بالکل تندرستی دی حالت وچ اک صحت مند جوان دے روپ وچ ویکھیا۔ جیہدے مگروں میں اوہنوں ایڈز ولوں جانکاری سنٹر کھولن وچ مدد کیتی۔ ایہدے مگروں مینوں عاصم نال محبت ہو گئی میں نے اوہنوں ویاہ دی صلاح دتی۔ ایہہ صلاح میرے خاندان ہی کیہہ سگوں عاصم لئی وی بڑی حیرانی والی سی تے عاصم ویاہ توں بچن لئی کراچی ٹر گیا۔ میں بڑا اوکھیاں اوہنوں سمجھایا تے ویاہ تے منایا۔
عاصم نے ڈیلی ٹائمز نوں دسیا کہ ویاہ توں مگروں میرے نال زندگی لنگھاوندیاں ہوئیاں روبینہ نوں ایڈز نہیں ہوئی۔ اوہناں دسیا کہ اسیں نیانہ جمنا چاہنے آں پر نیانے نوں ایڈز ہو جاون دے خوف نال اسیں فیصلہ کیتا ہے جو ٹیسٹ ٹیوب بے بی دا طریقہ ورتیا جاوے۔ اوہناں نے دسیا کہ لوکاں دا ساڈے نال ورتاء بڑا حوصلہ توڑن والا ہوندا ہے۔
