کشمور: کڑیاں ونی نہ کرن والے قتل دے ملزم تے اک ہور قتل دا الزام
وچار ڈیسک
November 16th, 2008
کشمور وچ اٹھ سال پہلوں اوگائی قبیلے دے اک بندے دے قتل تے جرگے نے فیصلہ کیتا سی جو قاتل دے خاندان دیاں چواں کڑیاں نوں جرمانے دے طور تے مقتول دے خاندان نوں دتا جاوے گا۔حالیں ایہہ معمہ حل نہیں ہویا سی جو مقتول دی گھر والی وی قتل ہو گئی تے اوہدا الزام وی اوہدے کھسم دے قاتل تے لایا گیا۔ ڈی پی او کشمور یونس چانڈیو نے دسیا کہ کشمور دے علاقے غوث پور وچ اُنی سونڑینوے وچ عبدالرزاق اوگائی ناں دے بندے دا قتل ہویا سی تے اوہدے قتل دا الزام مہمند حسن ناں دے بندے تے لگا۔ایس سلسلے وچ دو ہزار وچ ہوون والے جرگے وچ فیصلہ ہویا کہ مجرم اپنے خاندان دیاں چواں کڑیاں نوں ونی دے طور تے مقتول خاندان نوں دیوے گا۔حالی ایہہ معمہ حل نہیں سی ہویا کہ پچھلے مہینے مقتول عبدالرزاق اوگائی دی گھر والی وی قتل ہو گئی تے اوہدا الزام وی مہمند حسن تے لایا گیا۔ ڈی پی او دا کہنا ہے جو ایس کیس دی حقیقت جانن لئی حکم جاری کر دتے ہین۔ مہمند حسن نے پلس نوں دسیا کہ اوہ اک کڑی مقتول خاندان وچ دے چکیا ہے جدوں کہ تن کڑیاں نہ دیون دا اوہدے خلاف مقدمہ درج کروایا گیا ہے۔
